噚日個市驚心動魄，真係多得中移動（941）唔少，佢一日跌足10蚊，嘉賓就話已經跌夠，只因今個禮拜適逢期指結算，喺電訊業重組消息「順水推舟」下，先畀淡友借勢發惡，反而認為跌咗咁多應該係時候反彈。嘉賓仲率先入市，身體力行證明中移動現價絕對抵買。
錦：李錦 康：黃偉康 文：孫柏文
文：中移動上星期宣佈有鐵通併入，點知就俾佢搞到腸穿肚爛，係咪反應過敏呢？
康：其實中移動兩日跌咗十幾蚊，真係有啲過份，但係今個星期係期指結算，好明顯淡友主導大市，搵藉口平倉推低指數。講真，重組方案完全無驚喜，大家都預計得到，之前啲人先話中移動可以繼續保持龍頭地位，但𠵱家大行又唱淡，話有競爭，紛紛轉軚，真係出奇，我反而覺得係低吸機會。
文：今日二十大成交額嘅窩輪，中移動佔咗十九隻，究竟係買call定put多？
錦：今日有好多消息左右佢，但call同put成交都多。過去五個交易日，佢嘅街貨增加咗好多，上星期五（23日）就有過億資金流入中移動call輪；put輪成交其實都有增加，只係增幅無call輪咁多。
文：其實中移動跌落嚟都係因為政策，如果睇技術走勢，今日大插仲有無參考價值呢？
康：佢仲未失守250天線，應該可以守得住。𠵱家只係淡友質低平倉，所以我唔太擔心。
錦：如果散戶買咗認購輪無斬倉，亦千祈唔好溝貨。
康：我今日先買咗喎。
錦：急插之後係有機會反彈，但我都唔建議大家買貨，純粹係因為市場風險同時亦高咗好多，大家要小心。
中石油有機獲補貼
張小姐：我11.06蚊入咗隻中石油（857），想問吓使唔使止蝕。
康：唔需要，亦唔使太擔心。中石油𠵱家個價基本上唔係咁受油價影響，而係受政策影響。上星期傳國內提早喺6月開放成品油改革機制，但我認為CPI（消費物價指數）去到8.5%咁高，好難開放；反而獲政府提高補貼機會較大，因為中央已經救咗中石化（386），仲向中石油維持收暴利稅就講唔過去！我睇佢喺12蚊好難升穿，見12蚊就好沽。
張：你睇個市有冇機會跌落22000點？
錦：之前個市喺24000點有一定買盤支持，可以守得吓；估計今周喺嗰個位都會有買盤入，睇24700點。
康：我已經身體力行買咗貨。
上水張小姐個案
買入價：11.06元
目標價：─
止蝕價：─
時期：─
中電信$6.5先沽貨
陳先生：想問吓隻中電信（728）復牌後上升空間有幾多？
康：因為未知佢想收購嘅CDMA網作價幾多，所以存在不明朗因素。不過，6.5蚊嘅價位估值算合理，而市場一般估計個CDMA網估值約400億元。
陳：有分析員話佢有機會同中移動一樣做龍頭股，股價有冇機會升上幾十蚊？
康：或者要十幾年抗戰先得嘞，短期兩、三年好難達到呢個目標，建議喺6.5至7蚊水平沽貨。
錦：正股停牌，窩輪跟住停，呢個係玩輪嘅風險。如果隻輪喺正股停牌期間到期，結算價就會以停牌前嘅收市價計。
每日收市後4:30pm
歡迎click入 http://finance.appledaily.com以webcam參與節目及收看
歡迎phonein28698262暢談心得
亦可email至mailto:[email protected]搶先貼股
今日嘉賓：
