星期三凌晨起身睇波，辛苦異常，但唔睇唔得，因為曼聯對車路士爭歐洲聯賽冠軍盃（歐冠盃），肯定係盤腸大戰。雖然左丁山對兩隊並無偏好，事先估計曼聯會贏一比○或二比一，但場波一定會好緊張。
曼聯排陣無驚奇，最令亞洲球迷不滿不明白嘅，係近排奇勇嘅朴智星突然連後備都冇份。事先英國球評權威RobHughes就寫到曼聯最後十一場聯賽，朴智星九次正選上陣，全勝；兩次後備上陣，逼和對手，否則已失落英超聯冠軍。當然朴智星唔係Ｃ朗，但Hughes話朴智星全場奔跑，係曼聯前場活力之泉源，好有希望成為第一位踢歐冠盃決賽嘅亞洲球星。點知道費格遜去到最後關頭，寧願要「費柴」（Fletcher）打後備都唔肯畀朴智星一個機會，令左丁山聯想到種族歧視。當然曼聯人材濟濟，用通天老倌夏格維斯打右路中場一樣掂，而且夏格維斯嘅表現唔錯。
車仔領隊格蘭十分保守，死都係打單箭頭，杜奧巴全場只有一次射中龍門，不幸撞門柱，加時下半場重忍唔住火摑維廸一下，抵罰出場，但因此而埋下輸波伏筆。格蘭寧願以安歷卡換馬基列尼，點解唔用烏克蘭人舒夫真高呢？場波在莫斯科舉行，舒夫真高在大雨滂沱下，一個人熱身近一個鐘，格蘭當佢透明，最後半分鐘換後衞入場都唔肯用一個正職前鋒嚟預備射十二碼分勝負，其固執如此，令車仔擁躉激氣，而一代球星在祖國鄉親面前落得如此收場，傷心殆盡矣，睇嚟舒夫真高與杜奧巴一定離開車路士。
Ｃ朗除咗上半場頂入一球之外，不見特別出色，下半場車路士佔多啲優勢，全場打和係合理戰果，當然車仔球迷見到林柏特加時射中柱，會覺得好唔抵。但一場勢均力敵賽事之中，邊個有運就邊個贏，八卦邱幾次提點左丁山，逢壬水日，紅衫有運過藍衫，何況五月二十二日晨早三至五時，係壬戌日壬寅時㖭？不過呢啲嘢唔講得咁多。藍衣戰士的戰神泰利因杜奧巴不在，自願射最緊張嘅第十個十二碼，竟然跣腳而射中柱，讓曼聯死裏逃生，最後奪標，完全係紅衫好運啲之故。