內地電訊業重組消息終於出台，首先公佈咗鐵通併入中移動集團，但中移動（941）股價不升反跌，亦拖累恒指跌穿250天移動平均線，但上周五節目嘉賓認為，大市下跌係意料中事，5月是調整期，有機會調整到24166水平，但無論跌穿250天線抑或升穿250天線都意義不大，而過去三個月的調整亦屬健康。
碩：黃敏碩 傑：黃瑋傑 玲：楊慧玲
玲：重組消息出咗之後係唔係低吸中移動嘅好機會？
傑：中移動的確係可以趁低吸納，因為其他中資電訊股相繼停板，令市場買賣焦點都集中喺中移動身上，而市場認為電訊業重組對中移動有威脅，令佢股價下跌，不過佢年初到呢個月都有700萬以上嘅用戶增長，佢喺呢方面真係好強，所以124.1蚊係吸納好機會。
碩：中移動短期受期指因素影響，畀人作挾低指數工具。但中長線睇可吸納，如果大市去到接近短期調整底部，中移動隨着大市反彈係可以睇好。
傑：其實炒電訊業重組最穩陣就係炒電訊設備股，而當中我最睇好中興通訊（763）。
中鋁call博炒一轉
譚小姐：我買咗中國鋁業（2600）嘅窩輪（9203），理由係呢隻輪跌咗三日，覺得正股有機會上，等正股去到14.5蚊我就走㗎喇。
玲：你睇唔睇好中鋁後勁？
碩：中性喇，因為鋁價始終有不明朗因素，加上佢競爭又比較大，可唔可以提升盈利要睇佢未來業務有無多元化發展。而佢加入指數成份股都會有啲效應，不過要留意佢真正加入當日有無資金投入推動佢股價向上。不過，以技術走勢嘅裂口位去睇，係有條件有空間去博升一轉。
玲：我一向都有推介中鋁，佢去到呢個水位，加上下星期我預計大市會回升，佢係好有機會緊貼恒指步伐而回升。
-長沙環譚小姐個案-
買入價：0.096元
目標價：0.12元
止蝕價：-
時期：一星期
宏華差不多到頂
陳小姐：我係IPO3.8蚊抽到宏華集團（196），近期又再以3.42蚊加注，其實呢個位仲值唔值得揸落去呢？
玲：佢近期股價升返上嚟，唔知係唔係因為佢都有做石油相關業務有關。
碩：佢市值唔算大，亦無太大競爭優勢，睇佢由低位彈升到𠵱家呢個位，已經差唔多到頂。
陳小姐：只係想佢去上返水面走啫。
碩：如果6月大市反彈，都會彈行業龍頭股先，佢本身吸引力唔強，又睇唔到佢業務未來有乜嘢新突破，所以接近3.6蚊就可以走咗先。
-長沙環陳小姐個案-
買入價：3.8元/3.42元
目標價：3.8元
止蝕價：-
時期：-
首國短炒中旅可吸
許小姐：有幾隻心水股票，包括中信國金（183）、中外運（598）、香港中旅（308）、首長國際（697），呢幾隻前景得唔得？
玲：越嚟越貼近奧運，其實中旅會唔會有機會再翻炒呢？
碩：中旅可以睇好，但走勢可能比較慢同吽，要有耐性先得，策略係「宜吸不宜追」。
許：可唔可以建議吓，𠵱家呢啲價位，入邊隻最好？
碩：首國嘅鋼材係用嚟造船，毛利同邊際利潤應該會高啲；未來亦會生產輸油管嘅相關業務，所以首國嘅前景仍然可以睇高一線。中外運我就唔係太鍾意，佢做物流同速遞為主，但又唔係龍頭股，競爭力唔係好夠。至於中信國金，股價之前一路尋底，都係受SIV影響，呢兩日管理層又提到BBVA（西班牙對外銀行）注資計劃；另又可以憧憬佢壯大旗艦，發展財務管理業務。所以總括嚟講，短炒可留意首國，長線可吼中信國金。
每日收市後4:30pm
歡迎click入 http://finance.appledaily.com以webcam參與節目及收看
歡迎phonein28698262暢談心得
亦可email至mailto:[email protected]搶先貼股
