奧運聖火傳遞因為四川地震暫停咗一陣，最近繼續神聖之旅，上個星期四，國泰（293）常務總裁史樂山喺寧波傳聖火，成為第26號跑手。史樂山返到香港，禮拜五急不及待喺國泰城同傳媒tea，一來晒吓火炬，二來分享做跑手嘅喜悅，大讚呢次體驗「amazing」。
有幾神奇？佢話一邊跑，在場打氣人士就不斷叫「中國、加油！四川、加油！」令佢感受到中國人一條心嘅精神。史樂山仲用非常純正嘅普通話重複「中國、加油！四川、加油！」在場以普通話為母語嘅記者都讚佢講得正。
火炬放國泰城賑災
點解刨冬瓜如此了得？佢話以前做可口可樂業務時，聽得多自然好，又好謙虛咁用普通話話自己「聽比說好」。史樂山支火炬仲有任務，就係擺喺國泰城籌款，員工想同火炬影相，建議至少捐100蚊畀四川賑災，幾個鐘就籌到5萬銀。