四川大地震後，大家都不期然諗諗自己份保險夠唔夠。諗諗吓，好多人包括敏妮在內，第一份保險都係出嚟做咗冇耐嘢，同做保險嘅同學或者朋友買，而且相信好多朋友都係揀有儲蓄成份、即係日後可以連本帶利攞得番嘅壽險。
不過，越接觸得多唔同嘅保險計劃，計吓條數，敏妮就覺得，保險絕對唔係投資產品，就好似睇醫生一樣，係必需品，有病就要畀錢睇醫生。供保險想着數嘅，一係望自己早死，如果唔係，等老時攞番嗰筆錢，雖然話連本帶利，但扣除通脹，冇乜着數，分分鐘用同一筆錢月供「真正」嘅投資產品，回報會更吸引。
有位讀者朋友問有關醫療保險嘅問題，正如讀者朋友所講，醫療開支係一個好重嘅負擔，而且會隨年紀而增加，所以喺咁多種保險中，敏妮認為醫療保險係最需要購買嘅。
保險有別於投資
讀者朋友提到市面上有醫療加儲蓄嘅保險計劃，問敏妮意見。首先，敏妮唔知你係咪已經睇中邊個plan，冇得幫你計，如果你有興趣，可以透過敏妮blog畀啲資料敏妮幫你計吓。
幫襯同一家公司如某銀行，做齊儲蓄、保險、投資，可能會有啲着數，就好似去餐廳食setlunch會抵過散叫，但正如前面所講，保險就係保險，儲錢就係儲錢，兩者混為一談，供保險到時到候可以攞番啲錢，聽落當然着數，但呢個世界有冇免費午餐，自己諗清楚。
「套餐」或欠彈性
敏妮聽過唔少case，有儲蓄成份嘅保險，通常都有供款年期，投保人想唔供，唔單止攞唔番所有本金，可能仲要繼續畀手續費或者行政費。敏妮勸呢位朋友，喺能力範圍內，實際啲按自己需要揀個純醫療保險，好過搞咁多花款。
講開醫療保險，有位叫中環OL嘅朋友留言，從供MPF嘅經驗，講到政府大力宣傳嘅強醫金。中環OL深信，靠份MPF應該唔可以退休，家吓仲話要市民焗供強醫金，如果真正推行，佢會上街。敏妮支持你，當天街上見！
http://wanmanli.com/blogs/