日本球壇近期傳出唔少醜聞，首先係2月，4名J2仙台維加泰球員季前集訓期間到酒吧飲酒，本來摸下酒杯底好正常，但班球員兩杯落肚，竟走去停車場大肆破壞，最終班球員當然要罰款兼道歉。
正所謂酒能亂性，其實早於去年8月，同屬J2球會的水戶蜀葵會長酒後駕駛，最終引咎辭職已引起廣泛報道，但球員似乎冇吸取經驗。
數日前，鹿島鹿角中場球員大道廣幸酒後駕駛，中場拍檔船山祐二同車竟然無制止老友咁做，一樣有責任。酒後駕駛喺日本屬刑事案，事後兩人被警方調查，但冇向球隊報告，更在數小時後，乘搭飛機到河內備戰亞冠盃賽事，但紙係包唔住火，事件曝光後，球會高層鈴木滿非常震怒，開賽前1日將兩人遣返東京。
仲有一單，曾入選日本國家隊的柏雷素爾中場茂原岳人，最近被人翻舊帳，指佢7年前潛入1名女士住所內，偷取內衣褲及手提電話，當時佢只得19歲，雖然未有被定罪，但茂原岳人終於本周被球會炒魷。
茂原岳人偷底褲被炒
咁都未算激，上周六，大阪飛腳與浦和紅鑽球員賽後動粗，兩隊球迷更發生大規模衝突，雖然大阪飛腳承認，係由飛腳球迷首先擲水樽，引發今次事件，但兩隊均可能面臨處分。
日聯近年致力建立良好形象，例如安排球員到學校演講，參與慈善工作等，但近期發生咁多宗醜聞，令日職主席鬼武健二感到非常失望。𠵱家日聯打算立例，規定球員犯事要面臨停賽；但唔好忘記球員犯法，已經要受到法律制裁，究竟停賽對球員起到幾大作用呢？畢竟呢類醜聞經常都會發生，停賽的阻嚇力實在非常有限。
作者簡介：2001年開始擔任足球賽事自由撰稿人，曾親身採訪各項大賽，包括世界盃、亞洲盃及非洲國家盃等。現為香港賽馬會足智彩網頁撰寫球評分析。