八位副局長出籠，即時傳言四起，既話陳德霖建立馬房，又話副局長與政策局錯配，譬如將渣打銀行許曉暉派往民政事務局，總之閒話多多。
陳德霖建立馬房？有冇咁易呀？識得陳德霖嘅馬主W就笑：「做練馬師，有個人馬房，你估有咁易乎？陳德霖頂多係馬會嘅賽事董事，上面有應嘉柏，再上有陳祖澤，還有董事會。賽事董事想一個人發牌成立馬房，講嘢呀！」唔，曾特首係CE，應嘉柏係馬會CEO，勉強可以比較，講權位，當然CE高好多啦。特首之上有中央，中央還有政治局常委，如果有人在香港特區建立政治馬房嘅話，如無曾特首准許及中央首肯，絕無可能。向陳德霖放政治冷箭之人，唔好當其他人矇查查。即使副局長人選係陳德霖挑選過，亦係奉命行事而已。
講起馬房，三十四歲新貴許曉暉（Florence）做民政事務局副局長確會扯上關係。民政局所理雜事甚多，由山墳、火葬至圖書館、保護文物；由文化中心博物館至各區公眾泳池有無紅蟲；再由馬場應否准許十八歲以下兒童進入以至音樂話劇舞蹈，都與民政局有關。許女士係年輕媽咪，上任後大概冇時間回家吃晚飯，講古仔畀小女兒聽咯。曾局長不在，佢要做署理局長，碰啱馬會搵佢傾賽馬事務嘅話，或者真係會講到馬會夠唔夠馬房，使唔使搵地方興建多幾個馬房！
點解唔將曾在花旗、麥肯錫，現於渣打服務嘅佛羅倫斯（徐志摩譯為翡冷翠）派往庫務及財經事務局或商務及經濟發展局呀？馬主W以佢一貫刨馬、發掘高質馬嘅眼光分析：「嗱！我睇過八位副局長嘅履歷，呢位最年輕嘅佛羅倫斯學歷好（張祝珊英文中學、中大、劍橋），資歷好（花旗、麥肯錫、渣打），擁有高質，一開始就在最多麻煩瑣事嘅民政事務局工作，經常落區，即係等於將一匹高質新馬，日日早操三段，極力打磨，如果呢隻高質馬抵受得住，隨時升上精英班。我就話佛羅倫斯會係十年後嘅局長人選。」睇得咁好，因住大熱倒灶，新人初入官場，應知道到處都有蕉皮。