今日祖國企業要走出去，所以內地企業啲老總，好多都講得一口流利英語，嚟自河南省嘅建業地產（832）主席胡葆森就係其中一位，噚日喺視像IPO記者會上，佢首先用流利英語介紹公司背景，再用普通話回答提問，仲教埋正音，糾正一位將「集資」錯讀成「雜誌」嘅記者發音，後尾仲補多句廣東話：「多多關照，唔該晒﹗」兩文三語，令香港記者汗顏。
據招股書介紹，原名滑建明嘅胡葆森，1979年畢業於鄭州大學，主修英語，當年正值文化大革命完咗冇耐，考得上大學，可見胡總並唔簡單。
父親曾設獎學金
胡總爸爸滑振民生前曾經做過濮陽縣副縣長，仲喺該縣設立「振民獎學金」獎勵優秀生考上大學，或者係胡葆森上進好學嘅原因。