四川地震，中國企業有錢出錢，有力出力，唔少企業利用本業專長賑災，好似國壽（2628）助養四川地震中嘅遺孤至18歲、萬科為災區重建等，新華網噚日報道，中移動（941）特別開設咗心理諮詢熱線，幫助受地震影響嘅群眾走出傷痛，堅強面對災後重建。
報道話，中移動關注到內地災民嘅心理健康，所以設立心理諮詢熱線，之但係中國心理學從業員唔多，下一步佢哋會喺全國招募志願人士，培訓佢哋，然後隨心理專家到災區，現場為災民提供心理輔導。
其實，早前中移動已經開設愛心電話熱線，幫助災民搵番失散咗嘅親人，到噚日為止，已經成功為超過1.7萬人次尋親。