立法會今屆會期仲有兩個幾月就結束，議員足球隊噚日同官員隊終極一戰，已宣佈「掛靴」唔角逐連任嘅馬丁，噚日臨別「抽」波，着上18號球衣踢「告別賽」。雖然馬丁年近70，原來都幾好氣，噚日同高達mark實林D9。林D9博大霧出手批馬丁心口，高達更被鏟到撻低，兩人力指林D9奸矛，林D9就陰陰嘴笑，話係合法衝撞。
議員隊12場贏7場
政府委任副局長、政治助理幫手保駕護航，議員隊有樣學樣，噚日搵多名外援落場，實際只有六個議員上陣，官員隊方面，前特首辦助理處長陳羿係主力之一，佢稍後赴美深造，最快一年半載後先歸隊。
噚日場波議員隊贏一比零，功臣唔係議員，因為係官員隊「擺烏龍」入球，「塘邊鶴」政務司司長唐英年輸波唔輸陣，讚林D9鏟低兩個「反對派」有功；馬丁「掛靴」前捧盃心情興奮，反唇相譏話唔介意林D9摸吓獎杯。
議員隊隊長陳智思都唔角逐連任，踢完「終極一戰」都功成身退，佢統計今屆議員隊神射手係陳偉業，共入20球，佢自己同鄭家富各入五球雙亞軍。八方統計賽果，連同昨日一役，議員隊過去四年出戰12場，贏7場、輸場兩和兩場，成績不俗，新一屆立法會唔知有冇咁多好波之人。