小妹早幾日跑步發現對波鞋底甩甩哋，拎去街邊檔補鞋，要收幾十蚊好唔抵。轉軚買啲10蚊、8蚊嘅超能膠又唔知點揀。個個牌子都講到乜嘢木材、金屬、玻璃、皮革，樣樣都話黏得，有冇咁犀利？
消委會老友話，信呢啲超能膠廣告，不如信吓消委會嘅超能膠測試（圖）。消委會總共試咗10款市面最流行嘅超能膠，比較佢哋嘅黏着力、耐久性、接合點外觀等，選咗金屬、玻璃、皮革等七種物料進行大比拼。一試就知龍與鳳啦，普遍嘅超能膠黏金屬同皮革都差啲，但係黏其他嘅物料如木材、玻璃等表現都幾好。消委會選咗三款評分最高嘅超膠王，排名依次係偉德啫喱超能膠、犀利牌快易妥耐撞擊超能膠、樂泰強力超能膠。黏乜都OK。特別係偉德同樂泰，黏金屬同皮革都好掂。
塗得太多影響效果
不過，黏得勁有時都好大鑊，小妹曾經試過被超能膠黏住兩隻手指，夾硬扯開搞到一手係血。老友笑笑口話，正確嘅做法應該將沾有超能膠嘅皮膚浸入暖水，或微暖嘅肥皂水或洗甲水，等凝固嘅膠水軟化之後，慢慢拉開黏合嘅皮膚。
佢又教路，用超能膠都有啲技巧，首先要確保黏貼嘅表面無油脂、塵埃或已亁涸嘅膠水，否則要用酒精或稀釋咗嘅洗潔精抹淨黏貼的表面，風亁後先塗超能膠。仲有，塗得多反而會影響黏貼嘅效果，應該平均塗係要黏貼嘅物件嘅其中一面就得嘞。
電郵：mailto:[email protected]
逢周六、周日刊出