TVB揸fit人邵逸夫（六叔）早前留醫一段時間，出院後呢期好活躍，頻頻現身公開場合。四川大地震災情嚴重，六叔隨即捐出一億港元協助災民，近日災區情況穩定，六叔可能略為放心，噚日再次出動，同六嬸方逸華嘆下午茶。
八方聽聞六叔出院後一直心掛掛要去Hightea，不過六嬸卻擔心人多地方空氣唔好，近日終於搵到嘆茶好去處，就係中環太子大廈25樓嘅Sevva餐廳。噚日下晝大約5時45分，六叔同六嬸現身太子大廈，隨行仲有六叔貼身助理同朋友，落車後，六嬸快手幫六叔戴上冷帽同頸巾，出入冷氣地方，都係小心啲好。
嘆完靚茶埋單嫌貴
呢間餐廳新開張，由Joyce創辦人JoyceMa妹妹郭志怡投資開設，係型人新蒲點，最大特色係有個大露台，連新地郭炳湘都幫襯過。六叔、六嬸可能鍾意呢度有新鮮空氣，一行人坐低興致勃勃嘆茶，六嬸一面嘆咖啡，一面餵六叔食蛋糕，又幫佢抹嘴，六叔淨係飲清水，好健康。Hightea時六嬸幾多嘢講，六叔都偶有搭嘴傾偈，不過就慢慢哋講嘢，講吓食吓，一班人嘆足個半鐘頭先埋單。
六嬸碌卡畀錢時，好精明咁睇睇張單，之後笑笑口同侍應講：「嚟你哋度飲茶乜咁貴㗎！幾時有promotion？」唔係啩！？TVB開價成百億元都好多人爭住買，六叔捐一億賑災眼都唔眨，飲餐下午茶，又唔使節衣縮食，六嬸應該唔會嫌貴嘅，不過錢應使得使，可能六嬸諗住慳啲，捐多啲錢賑災仲有意義啦。
百億富豪都話揦脷，掃到個侍應勁尷尬，話暫時未有promotion：「遲啲啦！」埋單後六嬸帶六叔出露台遊花園，咁啱遇見關之琳、蘇施黃同金燕玲Hightea，大家寒暄幾句先走。六叔搭𨋢離開時，記者問佢食物好唔好味，六嬸代答話：「OK啦！幾好食。」六嬸又話唔係成日嚟幫襯，「我哋周圍去，得閒帶佢（六叔）周圍行吓！間餐廳環境都唔錯！」問到無綫賣盤進展，六嬸就封口，六叔、六嬸上車後，向記者揮手講拜拜，兩老心情勁靚，唔通就快有好消息宣佈？
mailto:[email protected]