失眠係好多上班族經常遇到嘅問題，要點先可以瞓得好真係一門大學問，除咗身體嘅調適外，良好睡眠環境都好重要，日本嘅室內設計師話，窗簾同睡眠質素息息相關，睡房窗簾嘅質地、顏色同功能原來可以影響我哋健康，所以揀窗簾唔好淨係諗裝飾用途，都要考慮吓隔音、遮光嘅功效，因為呢啲都會影響情緒同睡眠質素。
鮮色令人心情煩躁
好多人會誤以為睡房窗簾揀深沉嘅顏色一定啱，可以令人昏昏欲睡，原來窗簾沉色同鮮色都不宜，因為長時間對住沉色窗簾會令人抑鬱，但太鮮色都會令人心情煩躁，曾經有一對新婚夫婦，為咗襯番靚靚嘅心情，特登為睡房揀咗顏色鮮艷嘅窗簾，點知對耐咗竟然出現視覺疲憊，繼而變得好煩躁兼失眠，睇咗醫生都無乜改善，後來換咗啲顏色比較平實嘅窗簾先瞓得好啲。
其實窗簾嘅顏色最好係清新同自然，例如淺綠同淺藍呢類接近大自然嘅顏色，可以令人放鬆心情，容易受自然光影響而失眠嘅人，可以揀深紅配黑色嘅窗簾，研究發現可以幫助入眠。
除咗光線之外，聲音都係干擾睡眠嘅元凶之一，有醫學研究話當室內噪音持續達30分貝以上，就會影響正常睡眠，棉質、麻布同植絨質地嘅窗簾一般吸音效果比較好，窗簾越厚隔音越好，質地好嘅窗簾可以減少10至20%嘅外界噪音。
blog主：醫神