【本報訊】通脹持續高企，港人消費更趨精打細算。三名20餘歲的香港大學女生，靈機一觸，本月初成立「香港交換網」，推廣以物換物的另類消費模式，旋即吸引數百人入會。有會員以修理電腦換了一頓飯，有的更以車換車。網主強調，交換網嚴禁一切情色產品，以及不道德性服務。 記者：蔡朗清
去年畢業於港大經濟及工商管理學院的吳麗霞（Ada）及鄭謹瑜（Yu），聯同港大計算機科學系二年級麥曉瑩（Kelly），剛於本月2日成立香港交換網REVER，這源於三人家裏放滿簇新但不合意的物件。Ada表示，家裏有三個未用過風筒、無數衣飾影碟等，「買咗啲衫唔啱心水咪擺喺度冇着；我妹妹仲誇張，買幾十個LV等名牌袋，同一款鞋，買咗幾對唔同顏色。」阿Yu也不遑多讓，經常申請信用卡，家裏放滿簇新用品，「好似榨果汁機、空氣清新機，都冇用過，放滿喺屋企。」Kelly也有同樣情況。
技能及服務類受歡迎
三個女孩子住在港大同一宿舍，大家遇上同一問題，遂開始構思以物換物的消費模式。Ada表示，發現中國內地及台灣頗流行一些以物換物網站，加上近期通脹加劇，柴米油鹽樣樣加，決定設立港產交換網，「啱啱成立都冇乜宣傳，已有500幾人入會，𠵱家有成100宗成功個案。」
交換網的物品分17類，計有書刊、禮券及折扣卡、影視音樂、玩具、汽車及配件、手機及通訊產品等，「只要上網登記成為會員就得，費用全免。會員將物件相片上載到網，可以講明想換的乜，其他會員有興趣就可以互相交換物件，之後自行約出嚟交收。」
Yu表示，其中以技能及服務類別深受會員歡迎，「有人以修理電腦換咗一餐飯，用投資建議換咗個結他，用自製甜品換咗本書。」其他熱門交換物件有運動鞋店折扣卡，卡拉OK優惠券，「近期大熱換物有7-ELEVEN嘅Paddington熊。」
但Ada強調，並非所有物品或服務可以交換，網站嚴禁以物換錢，交換色情影碟，以至色情服務等，「我哋喺個網站寫清楚有啲乜嘢唔可以換，我哋會監察住個網，一有違禁品就即刻刪除。」
香港交換網小資料
網址： http://www.rever.com.hk
類別：手機、禮券、玩具、影音、技能及服務等17種
特色：將物件或服務代替金錢，換取心儀的東西
資料來源：香港交換網
特稿：換物識朋友 一舉兩得
港大一年級學生Kuma（19歲），本年7月將以交換生身份到丹麥讀大學，除了籌措生活費，還花二、三千元購置睡袋、冷帽、冷襪等禦寒用品。她說：「𠵱家啲嘢咁貴，買嘢都好頭痛，最近發現咗有個以物換物嘅網站REVER，即刻用咗30蚊嘅KFC現金券換咗一對日本長襪，我諗住換埋睡袋、冷帽。」
Kuma入會半個月便換了四、五件產品，「我用咗戲飛換咗一本心儀嘅書，又換咗隻DVD影碟，呢個以物換物嘅消費模式真係幾好。」
另一會員張一村（24歲）從事金融業，剛剛將一部用了約一年的本田Civic二手車，放上REVER交換另一部車，「之前經網站我都換咗好多書，今次試吓換車，我買嗰陣都成二萬幾蚊。」他指交換網不但可換有需要產品，更可以認識朋友，「好似我約啲網友換書，傾傾吓變咗書友。」
本報記者