《原來愛上賊》播完，你會唔會好掛住嗰隻蟹？同嗰對腳？長腳蟹做完賊，今次狙擊蓮花跑車，訪問前問呂慧儀想試咩車，佢話：「Lotus吖！」嘩！狠辣得嚟不失高貴！問車行借嚟225匹LotusEuropaS，唔使講嘢，上車即踩一轉清水灣道。轟轟轟！沿途死咗一次火，斜路起步響咗一次胎。點解揀蓮花？「我朋友有吖嘛！」狠辣車手原來流流哋，不過，兩條腿真係好長，43吋，堅嘅。
撰文：嘴嚼爺
攝影：林栢鈞
最愛中出孖喉
呂慧儀（Koni）本來想試Lotus又想試AstonMartin，「因為我都有朋友有囉，坐過覺得好型。」除咗想講Koni啲朋友好富貴外，仲想話佢都幾有品味，「我覺得呢類跑車線條好靚，而且辣得嚟好高貴。」即係一味炸到暈嘅MK群請彈開。
未開車前，Koni先圍住架LotusEuropaS兜咗個圈，「個車尾最靚，尤其嗰對孖喉，我唔鍾意燕子喉。」鍾意中出孖喉，「仲有啲網，好型。」講緊嘅係鬼面罩、車尾、門側嘅網狀入風口。讚完一大輪，上車見到奶茶色格仔皮裝飾，繼續有讚無彈：「嘩，呢啲格仔皮好靚呀，好高貴，嘩，張Seat都好好坐，嘩……」嘩嘩嘩，落車影多張相先吖？「唔制呀，我唔落。」咁嗲做乜？原來因為上落好麻煩，「我數得出嘅缺點就係個Seat位低，同埋車櫳比較窄，上落好麻煩。」因為你對腳長啫，不過好老實，呢架LotusEuropaS內外都有貴氣，但如果女車手着短裙擒出擒入又的確係會好狼狽。攝影師仲細細聲同我講，最衰Koni條短褲唔夠短喎，如果唔係就真係上落一刻值千金。𠵱……乜你咁㗎！
最怕6前速
「我哋諗住去清水灣道嗰邊影相……」筆者未講完，Koni已經話：「好呀！不如我揸吖！」
由將軍澳工業區出發，開車起步轉出環保大道唔使點停燈位，Koni轟轟聲揸得好開心，停燈位，「個軚都幾輕，呢架車馬力大又有Turbo，估唔到都幾易揸喎。」點知再起步，死火喇，「哎吔，咁核突㖭。」之後清水灣道斜路開車，今次無死火，不過響胎，「我都真係太耐無揸棍波車，咁響胎證明馬力夠大。」呢架車係馬力大，但咁響胎係證明你彈極力子……
拍劇扮狠辣女車手，實情係普通女司機，一個高䠷腳長樣靚身材Fit嘅女司機。0至100km/h對佢嚟講無意義，6前速手波對佢嚟講更加由玩具變負累，「我19歲幾就考牌，不過考完之後多數揸自動波，呢架Fit係我選完MissHK後買畀自己嘅獎品，都係實用為主，體積細，泊車唔使擔心嘛。我鍾意遊車河，但揸車唔快，安安全全先享受到揸車樂趣嘛！」04年奪港姐季軍，揸咗4年車，領悟到一個道理，「跑車玩吓就好，𠵱家啲車多數都有加減波，唔需要極力子嗰啲喇。」呢點我贊同，對腳長啫，唔代表吊得耐極力子唔會腳軟㗎嘛。
Dreamcar頭文字E
係女司機，唔係女車手，讓線唔望衝出嚟、唔識路就慢駛、轉咗彎十年都仲打緊盞燈，我叫呢啲做蠢！至於呂慧儀呢，呢啲叫做可愛。係呀，呢個世界好唔公平㗎！
循例問起Dreamcar，唔係百萬名車唔係豪華轎跑，呢啲咪可愛囉。「唔……我𠵱家都係想要架實用啲嘅，其實我想買架大少少嘅七人車，E字頭嗰隻呢……」Elgrand！竟然可以成為Dreamcar，相信日產自己都估唔到，「咁我係想要架7人車做保母車吖嘛，你問𠵱家個Dream吖嘛！」
咁第二時個Dream呢？「其實我都想考番個電單車牌，耐不耐玩吓。」嘩，唔怕整花塊面咩？「玩吓啫，唔係搵命搏。我鍾意嗰啲新款綿羊仔，鍾意大少少豪華少少，因為我個人高大嘛。」
咦？咁似講緊我架車嘅？發達喇！箝實啲吖唔該！
LotusEuropaSProfile
引擎：1,998c.c.直4Turbo
馬力：225ps/5,400rpm
扭力：30.5kgm/5,000rpm
傳動：6前速手動
0-100km/h：5秒
查詢：RichburgLotus（28770810）
