9月立法會選舉後，邊個議員有得留低係未知之數，但新一屆立法會開會前，已經有人鐵定佔議事廳一席位，就係會喺9月29號開始，正式接替馮載祥出任立法會秘書長嘅吳文華（Pauline）。
由於Pauline自立法局年代已服務立法機關，回歸前更捱義氣長駐深圳應付臨時立法會工作，所以佢坐正做秘書長可以話毫不令人意外，不過立法會公開招聘好認真，據講有逾30人申請，經過首輪淘汰後，有五人進入第二圈，當中三人係立法會職員，最後兩人入圍「總決賽」，八方聽聞Pauline對手係一名喺高教界任職財務管理工作嘅男士。
范太做臨立會主席時已同Pauline合作無間，噚日話對佢獲委任為秘書長深感欣慰，仲讚佢有行政及領導才能，佢強調委任Pauline係立法會行管會集體決定，唔係用人唯親。Pauline則話上任後會做好議會工作同新立法會大樓籌備工作，期待新大樓落成後，市民可以有更多機會了解議會工作。立法會秘書長人工連津貼月薪逾19萬元，任期三年，屆時Pauline剛好60歲，夠鐘退休。