星期一晚上，做大鄉里入城，城者，乃機場亞洲博覽館是也，左丁山從未去過，呢晚係老牌（六十歲咯）歌星艾頓莊（EltonJohn）演唱會，唔少鬼佬朋友話要去聽，於是雖然山長水遠，都試吓去機場博覽館聽歌。但回心一諗，如果聽到好夜，返到屋企已在凌晨，第二朝晨早起身返工會好辛苦喎。卒之諗出一個好辦法，就係在機場富豪酒店訂房一晚。一問之下，房租一千一百元，回贈酒店餐券一千一百元，其實即係為餐飲生意招徠，房間免費啫。人客一時高興，吃餐超過一千一百，酒店就可以賺多啲。酒店房間在經營學上，屬perishablegood（可消亡貨品），每晚無人入住嘅話，價值等於零，故此將房租全數回贈於餐飲方面，酒店有得無失，但在客人嚟講，心理上覺得幾着數噃，容易受落，好似左丁山咁，就因利乘便，入住一晚，食番一餐。
既然如此，坐機鐵到機場富豪吃晚飯，再坐機鐵去博覽館。嘩，成架車坐滿人，似足早上九時在尖沙嘴地鐵站坐地鐵過中環咁逼，乘客九成係外籍人士。想落亞洲博覽館有明星級表演嘅話，港鐵最受惠，做多好多生意。啲外籍人士猛話坐機鐵由中環往博覽館，只需半小時直達，方便過由中環去紅磡體育館，verygood咁話。入到場館外面，只見人山人海，嘉士伯不知用甚麼價錢投得「獨賣權」，一大杯生啤賣五十蚊，啲國際人士好似飲水咁，啤酒檔被人群包圍，收錢都收唔切。人群之中，竟然碰到一級寫手麥奇連（前彭定康、陳方安生之演講稿起草人），麥奇連現在係國泰航空顧問，嚟博覽館聽EltonJohn，一啲都唔奇，佢大概會覺得奇怪左丁山為何在博覽館出現啩？麥奇連話：Thisisaseniorrockconcertfortheseniors，認真幽默！至於音樂會本身，場館嘅音響效果似乎比較一般，聲浪大到無倫，坐在前幾排嘅，耳仔不知如何頂得住，EltonJohn好識做，開始之前，為四川死難者默哀一分鐘，第一首歌係"FuneralforaFriend"，走慣江湖之人，觸覺零舍敏銳！