黎耀祥演出過百套劇集和電影，可是卻因外形局限總未能攀上男主角之位，不過他的努力使他獲封「綠葉王」稱號，但他卻不甚接受。他前晚亮相《蘋果》網站直播節目《娛樂開CHAT》，他說：「當大家界定咗好多嘢，就會局限咗演員嘅表演形式。」此外，祥仔兒子黎正橋更透過webcam跟父親對話，大晒溫情。大家可登入《蘋果》網站 http://ent.appledaily.com隨時重溫節目。
採訪：葉雪 攝影：陳偉權
黎耀祥髮型：IvanLee（Headquarters）
懷鈺髮型：MattChiu（XENTERJUT）
版主：凌零發
拒承父衣缽 正橋
正橋：Hello，想問你幾時返嚟食飯？
黎耀祥：就喇，快喇！你不如同大家分享吓對我嘅感覺吖？
正橋：唔會成日鬧人啦，做嘢好投入啦！
主持：祥仔，你有冇諗過個仔大個會做乜嘢職業？
黎耀祥：冇㗎，佢想做乜咪做乜囉，真係冇乜所謂。
主持：正橋，你諗住大個做乜嘢職業呀？
正橋：好多㗎，警察啦、飛機師啦……
黎耀祥：我哋成日話佢做飛機師就好啦，我哋有平價機票。
主持：仲有冇呀？
正橋：仲有……全部都係誇大㗎，例如做集團主席、扮皇帝、有時想做慈善家，其餘都冇乜喇。
主持：咁你會唔會學爸爸演戲呀？
主持：又唔會喎，因為成日都冇得瞓，成日都冇得食。
當仔成年人 何文田火柴人
火柴人：你拍戲咁忙咪冇時間陪個仔囉？
黎耀祥：基本上，呢個世界我得兩個地方去，一個係返公司，一個係喺屋企，所以我都畀好多時間佢㗎。
火柴人：我都有個女11歲，我想問你點樣同囝囝溝通？
黎耀祥：首先你要當佢係大人，所以啲人講大道理話點樣教仔，其實唔使㗎，你用心對佢好就得。我個仔都好明白我呢個爸爸為佢犧牲咗好多私人時間，有時拍完通宵戲，我會同佢食埋早餐先至瞓覺。
火柴人：我同個女太friend，感覺好怪。
黎耀祥：父母同仔女係應該有倫理上嘅關係，佢應該尊重我係老竇，唔可以當我係friend，你要畀佢知道，佢有乜嘢事，你都會喺佢身邊。
最叻煲靚湯 旺角阿Fa
阿Fa：我睇嗰套《同事三分親》，你演嘅昌哥煮嘢食咁叻，平時你有冇煮嘢食㗎？
黎耀祥：以前係我煮飯㗎，不過𠵱家有工人，同埋𠵱家比較忙啦，所以我都將我嘅廚藝心得傳授畀我個工人，有時我都會矯正佢嘅烹飪手法，同埋介紹一啲新菜式畀佢試吓。
阿Fa：咁你擅長整乜嘢？
黎耀祥：我鍾意煲老火湯，因為煲湯係南方人嘅精髓。夏天不外乎青、紅蘿蔔，秋天就煲啲西洋菜囉。
娛樂開CHAT：關智斌、林熙蕾下周輪流CHAT
各位娛樂版擁躉，有興趣和你的偶像傾談嗎？《娛樂開CHAT》將請關智斌及林熙蕾擔任嘉賓，他們分別於5月27日（下周二）及5月28日（下周三）與讀者談天說地，參加者同時有機會得到偶像珍藏禮物，只要你有webcam及headset，並於當日6:30pm準時登入 http://ent.appledaily.com即可，節目於當晚7:00pm在《蘋果》網站直播。
