吳雨霏（Kary）由Cookies到PingPung，到現在以獨立歌手身份發展，在歌唱事業上取得不錯成績，特別是由她演繹的失戀情歌大受歡迎，原來Kary從沒有經歷過歌詞所描述的失戀苦況，要唱出當中的感情，她只好光靠想像力，努力把自己代入其中。
吳雨霏在Cookies年代是最不起眼的一個，之後餅女由9變4，Kary有得留低，接着她加入PingPung以rock女形象示人，近年她大唱失戀情歌，事業越來越好。
一首又一首歌曲受歡迎，Kary能夠唱出當中失戀之痛，令歌迷有共鳴，當然居功至偉，但原來年僅21歲的她沒有太多戀愛經驗，她日前說：「我咁細個邊有咁多經驗呀，所以唱呢啲情歌之前，都係聽多啲身邊朋友嘅經歷，到唱嘅時候就將自己代入去。」
轉攻快歌
不過Kary決定在新碟捨棄這些大熱情歌，轉攻快歌，她這個決定連老闆也未知道，她笑說：「我都覺得今次呢個決定好大膽，成隻碟得4隻慢歌，因為好多人開始覺得我應該係唱情歌，我唔想咁快定型，我想試多啲唔同嘅嘢。老闆都未知我有咁嘅決定，如果佢反對嘅話，我都會堅持，盡量說服佢畀我咁做。」
表現淡定
早前Kary舉行個人演唱會，雖然不是在紅館舉行，而是在容納3,000多人的StarHall，她已感到滿足，當然下一個目標是向紅館進發，她說：「開完StarHall個騷，我𠵱家對住群眾唱歌都冇咁驚啦，以前我出場前一定會好驚，有時仲會驚到腳震，有咗演唱會嘅經驗，𠵱家淡定咗好多。」她更希望下次舉行演唱會，可以邀請到偶像林憶蓮和蕭亞軒一起合作。
採訪：李珮洳 攝影：仇志德
髮型：VincePang（ILColpo）
化妝：KrisWong
