北京奧運8月就殺到嚟，數碼廣播會提早在下月覆蓋全港大部份地區，唔怪得呢排去巡吓啲影音店，多咗啲內置數碼廣播接收器嘅LCD電視機。搞到小藍心思思想買番部。點知老友亞洲高清協會幹事Alan話，「如果你等得嘅話，等到年底先好買」。
Alan話，電視機內置接收器好處，係一部機搞掂，唔使用兩個遙控器咁麻煩，但係𠵱家內置接收器嘅電視機只限韓國機、二線嘅台灣機、大陸機，仲冇一部可以錄影㖭，「我收到料，日本啲一線機喺年底推出內置接收器嘅LCD，有可能有埋錄影功能，唔急嘅話到時可以慢慢揀」。
唔使買咁貴
Alan仲話，𠵱家外置機頂盒播放數碼廣播嘅畫面質素，同內置嘅冇乜分別。如果消費者𠵱家一定要買電視機，建議不如分開兩樣嘢買。佢話，𠵱家機頂盒質素都差唔多，價錢大約1700蚊，但講到畫面嘅細緻度、對比度等，Olevia同MagicTV兩個牌子嘅表現較好，但係後者冇得錄影，吸引力差咗啲。機頂盒都係過渡期產品，遲啲出埋可錄數碼廣播嘅藍光錄影機，機頂盒一定會淘汰，所以唔使買咁貴。
逢周五刊出