副局長同政治助理名單出爐，有人歡喜有人愁，最高興嘅相信非特首辦主任陳德霖，人稱「攞命陳」（佢洋名叫Norman）莫屬，事關扣除個別「欽點」人選同分贓畀政黨名額後，近半係佢嘅人，由於當局一直冇公開任命副局長同政治助理準則，十足黑箱作業，指攞命陳隻手遮天都不為過。
工聯會成員劉信通醫生盛傳會做副局長，點知食詐糊，工聯會聲言要攞命陳畀個說法。噚日立法會宴請特首同行會成員，攞命陳一到場，就俾工聯會嫻姐同鄭耀棠拉埋一邊，三人密斟近15分鐘。八方見到兩個工會阿姐阿哥狀甚勞氣，一時指天，一時篤地，攞命陳多數時間頭耷耷，偶然講兩句說話，似乎好努力解畫，最後拍拍棠哥膊頭閃開，然而棠哥似乎唔係幾收貨，食飯時仍然面燶燶。
俾人笑「歸邊」冇反駁
向工會頭頭落完一輪嘴頭，攞命陳卻同民建聯言談甚歡，因為該黨今次佔到三個位，副主席劉江華主動叫對方坐自己旁邊，攞命陳恭敬不如從命，有人笑攞命陳「歸邊」，佢都冇反駁，連佢「契爺」肥龍都笑到見牙唔見眼。
事後八方問嫻姐，攞命陳對工聯會中空寶有乜解釋，嫻姐話建議特首辦日後做事應該有個交代，至少畀封信落選者，等人哋唔使心掛掛，不過攞命陳話有困難，事關申請者眾，逐一覆信好麻煩咁話。棠哥則向人透露，工聯會今次冇正式向煲呔推薦人選，所以嚴格嚟講唔算俾人「跣」鑊金，只是神女有心，襄王無夢，佢都無可奈何，希望下次唔好再鬧出笑話啦。
前民主黨員謝永齡，自傳出可能做副局長後一直潛水玩低調，甚至有人傳佢已辭去城市大學教職，開埋歡送會，做好準備入政府，連去年忽然退黨，都被視為同鋪路做官有關，點知副局長同政治助理佢都榜上無名，議席、教席、官位通通落空，慘被人笑佢係「三失」人士，加上佢年紀唔細，受咁大打擊份外凄凉。
八方噚日終於搵到謝永齡，佢澄清自己無遞信辭職，絕非「三失」，更指有人「老作」。至於仲有冇機會入圍，佢話無可奉告。
mailto:[email protected]