百物騰貴，買餸都要諗過度過。老鼠斑，細細條都要百幾二百蚊，想食靚魚，梁樹華師傅教路：「食平民老鼠斑（即係桂花魚）啦！」
「桂花食得太多了，多數是清蒸，有冇乜嘢新食法呀？」
「鮮魚唔一定蒸，將魚煎封後，埋個XO醬芡汁，好惹味㗎！」
記者：黃潔蓮
攝影：楊錦文、梁細權
示範：香港廸士尼酒店晶荷軒餐廳中菜總廚梁樹華
梁樹華師傅
入行30年，曾經在日本工作6年。97年後在中環文華東方酒店任職中菜總廚，亦曾代表香港貿易發展局到德國柏林推廣香港美食。
XO醬煎封桂魚
4人份量
30分鐘
桂花魚本身魚肉較滑，除了清蒸，煎或炸都同樣咁好食！
材料
桂花魚1條、薑絲20克、葱2棵（切粒）、辣椒1隻（切絲）、XO醬2茶匙、清雞湯1/2杯、菜油2湯匙、粟粉少許
調味：雙璜生抽2茶匙、鮮味雞粉1/2茶匙、鹽1/2茶匙、糖1/2茶匙、廚酒適量、粟粉1茶匙、老抽少許
醃料：鹽2茶匙
做法
囗將魚洗淨，在魚身兩面橫切兩刀，用醃料醃魚5分鐘，冲去鹽份再用布吸亁水份。
囗大火燒熱鑊加入菜油，放進魚用中火煎至兩面金黃色至八成熟，其間要不停轉條魚，讓火力均勻煎熟魚，隔起備用。
囗燒油鑊加入油，爆香薑絲，加入XO醬、清雞湯，再放入魚，加調味，以中火煮5至7分鐘至熟上碟。把魚汁用粟粉埋芡淋在魚上，再加葱粒及辣椒絲即成。
梁小姐：除了桂花魚，仲有乜嘢魚適合做呢味餸呢？點煎先會唔黐鑊？
答：可用凍銀鱈魚或鯇魚，同樣煎至八成熟再埋芡。煎魚不黐鑊，可在鑊中加薑片搓勻後才加油，還要不停轉條魚，火力會均勻啲。
雙璜金蒜霸王雞
6人份量
1小時
蒸雞滑的秘訣在於怎樣調校個雞汁，配葱絲及薑絲就更好味。
材料
鮮雞1隻、薑絲60克、葱2棵（切絲）、紅尖椒1隻（切絲）、炸蒜茸50克
醃料：鮮味雞粉1茶匙、鹽2茶匙
雞汁：雙璜生抽75毫升、特級老抽1茶匙、鮮味雞粉1茶匙、砂糖2茶匙、清水75毫升、麻油1茶匙
做法
囗將醃料及葱倒入雞櫳內捽勻醃半小時。
囗鑊燒滾水，用器皿載雞，隔水蒸20至25分鐘後放凉備用。將雞隔起斬件後，蒸雞的汁留用放回鑊中加熱，淋在雞上。
囗燒熱油鑊煮熱雞汁料中的水及生抽，放進薑絲略炒，加雞粉、糖、老抽及麻油煮成雞汁。
囗將雞汁淋在雞上，加上紅椒絲及炸蒜茸便成。
呂小姐：蒸雞用邊種雞好食啲呢？
答：最好選用2斤至2斤半的新鮮黃油雞，油份多，肉更滑。
蠔皇鮮百合牛肉
4人份量
30分鐘
蠔油跟牛肉味道好夾，蠔油的鮮味，可以辟去牛肉臊味，亦可以帶出鮮味。
材料
紅/綠/黃甜椒各1個、鮮百合2個、新鮮牛肉片250克、
蒜茸/亁葱茸各1/4茶匙、菜油少許
醃料：雙璜生抽1茶匙、糖1/4茶匙、粟粉1茶匙、清水2湯匙、菜油2湯匙
調味料：鮮味雞粉/糖/鹽各1/2茶匙、清水適量、粟粉1茶匙、舊庄特級蠔油2湯匙
做法
囗三色椒去籽，切欖角形，洗淨備用。鮮百合切去頭洗淨備用。
囗先將牛肉片加醃料撈勻備用，最後加菜油。燒熱油鑊，將牛肉炒至八成熟隔起。
囗燒熱油鑊，放入彩椒，加入調味的雞粉、糖、鹽及適量清水炒3分鐘，加入百合炒勻，隔起。
囗燒熱油鑊，用細火爆香亁葱茸及蒜茸，放入彩椒及百合，加牛肉炒勻後再加蠔油，最後將粟粉加清水1湯匙埋芡，再加少許菜油略炒便可上碟。
QQ：邊部份牛肉適合用來炒呢？有乜方法可以令到啲牛肉滑啲？
答：用牛柳會較嫩滑，而且在醃牛肉時加適量啤酒，醃出的牛肉效果如同加了梳打粉，會很軟滑。
鮮茄薯茸鷓鴣羮
6人份量
1小時
番茄薯仔湯飲得多，將之打爛晒後加埋鷓鴣茸，食落好有口感。
材料
鮮鷓鴣2隻、薯仔300克、番茄250克（切粒）、清雞湯1公升、菜油適量
醃料：雙璜生抽1茶匙、雞粉1/2茶匙
調味：雞粉/鹽各1茶匙、糖1/2茶匙、生粉水/胡椒粉各適量、麻油2茶匙
做法
囗將薯仔切片蒸軟，壓爛成茸。番茄煮熟去皮去籽切粗粒。
囗先將鷓鴣洗淨，起肉剁成免治肉，加醃料醃好備用。
囗在煲內放少許菜油，再放清湯煮滾，加入薯茸慢火滾5至7分鐘，放入鷓鴣肉，用筷子拂開，加入雞粉、鹽及糖煮熟。
囗加適量生粉水埋芡後，加入番茄粒、麻油及胡椒粉即可。
羅小姐：用邊種薯仔好啲呀？要粉啲定黏啲嘅好呢？做法有乜唔同？
答：加拿大黃肉薯仔黏性重，煮時可不用加生粉芡。如果薯仔唔夠黏，可以加生粉芡推稠。
網上重溫
http://cooking.appledaily.com