黎明聯合其音樂好拍檔雷頌德和林夕發揮愛心，昨日他們宣佈為受四川大地震影響的小朋友創作一首新歌，這首歌曲會製成單曲推出，所籌得的善款用來推行「心靈重建」計劃，讓這次地震中的孤兒重拾健康快樂的心靈。
黎明（Leon）昨日以聯合國兒童基金國際親善大使身份在跑馬地出席記者會，並主持支票捐贈儀式。他表示為災童而創作的新歌仍在籌備中，希望在兩星期內完成，他說：「阿Mark（雷頌德）喺兩個鐘頭內寫好首歌，希望錄音順利，快啲推出到，我同林夕通電話，想做呢首歌幫吓啲小朋友，林夕都忍唔住講到喊。」
Leon希望藉着音樂，令一班孤兒重拾快樂，並推行「心靈重建」計劃，其中一項是將稍後籌到的善款用來購買電子遊戲送給當地兒童，他說：「好多小朋友因為今次嘅災難而變成殘障，以前畀佢哋嘅物資玩具可能已經唔啱玩，送多啲電子遊戲機畀佢哋，希望令佢哋聚埋一齊玩吓遊戲，令佢哋開心番。」
一世的工程
Leon不諱言「心靈重建」是一項長期工作，問他會否也因最近的天災新聞而需要「心靈重建」？他說：「每個人都有脆弱嘅時候，唔係經驗所能承受，但我有咁多經驗，教曉我應該冷靜幫人，我覺得葛優都講得好啱，唔好放晒焦點喺藝人度，我哋只係因為比較前線，其實今次有好多無名英雄出過唔少力。」林夕則透露自從5.12後，沒有一晚睡得好，他表示除了物資外，也要令災民重拾健康快樂的心靈，而這工程是一世的。
此外，Leon女友樂基兒（Gaile）前晚為法國珠寶品牌VanCleef&Arpels首次穿婚紗行騷，她說：「因為呢條婚紗係22吋腰，有少少緊，自己要深呼吸先着到，不過我唔恨22吋腰，因為個身襯唔到。」問男友Leon會否嫌她的身形？她說：「Leon都冇，都冇人話我肥，肥瘦都冇所謂，都係同一個人。」
記者笑言Leon有中年發福的迹象，問Gaile會否介意男友變成大肥佬？她笑說：「冇所謂，只要嗰個係佢就得。」問她結婚時會否穿婚紗，她說：「冇諗過，中式都冇諗過，其實都冇諗過結婚。」
採訪：胡比、羅慧敏 攝影：林德雄、陳志嵐