繼李連杰、韓紅及黃曉明等內地藝人先後到四川地震災區救援後，方力申（Alex）、鄧麗欣（Stephy）及蘇永康等港藝人先頭部隊帶着約70萬元的救援物品到達都江堰。面對數千等候領取救援物品的災民，他們無不動容，其中一名婆婆捉着Stephy的手說很掛念失蹤女兒，Stephy聽到心酸得幾乎流淚。
四川發生八級地震逾一星期，香港各界義不容辭籌款賑災，方力申、鄧麗欣和蘇永康等港藝人先頭部隊，帶着救援物資到災區探訪，親身將關懷送給災民。日前（21日）三人聯同內地藝人瞿穎及王一冰等，帶備自資的70多萬元物資到達都江堰，昨日Alex和Stephy完成使命返港，於尖沙嘴接受訪問講述感受，談到在災區的見聞，兩位活在幸福中的年輕人都不禁嚴肅起來，Stephy更一度眼紅紅。
急需帳篷
災民領物深表感激
Stephy甫開腔便感慨道：「去到嘅第一刻真係呼吸唔到，非常難受。」Alex則透露今次救援物品中，有50萬元是藥物，另有一些手套、口罩、內衣褲、女性用品、收音機、蚊帳及帳篷，他說：「𠵱家嗰度大概有16萬個帳篷，但佢哋仲欠缺300萬個，所以仲要繼續努力。」
Stephy等人在當地入住成都酒店，其間遇過兩次輕微餘震，都江堰昨午一時許更發生4.3級餘震，成都也感受強烈，若他們遲一天到達便會遇上。Stephy等前日早上乘車到都江堰派發物品予災民，在派發物資的據點上，一早已排滿數千名災民，其中蘇永康及軍人最受歡迎。災民得到援助後，臉上流露說不出的感激，Stephy看在眼裏，忍不住眼紅紅，一位婆婆更捉着她的手說很掛念失蹤的女兒，令Stephy幾乎落淚。她昨日嘆口氣，聲震震地憶述：「呢對公公婆婆一日之間冇晒屋企人，婆婆話我同佢個女年紀差唔多，佢一見到我就捉住我隻手，話好掛住個女，佢激動到喊，又好唔捨得我走，我哋臨走時送咗個收音機畀佢，等佢可以聽最新消息。」
Alex則說：「醫護人員同我哋講，𠵱家情況已經好咗啲，街上冇乜受傷嘅人。如果我哋喺事後三、四日去到，一定受唔住。我知道救護人員同軍人都好辛苦，有軍人九日冇除過鞋，三日冇洗面。𠵱家啲人要住露天帳篷，生活得好辛苦，剎那間冇晒啲嘢，用品有錢都買唔到，要等政府派發。」Stephy又說：「我哋帶畀佢哋嘅嘢其實唔夠，有啲人問我哋攞奶粉，但我心諗佢哋食完嗰罐奶粉，之後又點算呢？有啲人見到我哋派嘢感動到喊，有啲人會爭吓，但我哋明白佢哋嘅心情。」
平衡情緒
Alex願再送正能量
看到劫後重生的苦況，問二人回港有否需要接受心理輔導，Stephy說：「我哋出發前已經睇咗啲心理輔導嘅資料，提醒我哋唔好帶自己嘅情緒返嚟。」Alex謂今次帶正能量到災區，有需要他願意再去，他說：「我爹哋媽咪都贊成我去，不過臨出發時媽咪望住我好想喊，好似以為再見唔到個仔咁，有啲朋友SMS叫我唔好做英雄。」Stephy則說：「我收到好多朋友SMS，今次之後我終於明白香港係福地呢句說話。」
採訪：王連連
