180萬幫拉利襯衫

Pininfarina可算車界最貴整容王，美國一位基金經理攞架法拉利Enzo畀佢改，埋單足足四百萬，仲係美金！呢位設計師跟法拉利、瑪莎拉蒂有密不可分的關係，好多車款就出自佢手。當然，你買得起拉利，點都有番啲腌尖本色，就咁加Option點夠獨一無二？拉利就剛推出One-to-One服務，由頭到尾幾十項Parts都可改動，全套執齊超過180萬，買個全球獨家都抵番晒啦！

記者：徐影龍
攝影：林栢鈞
Model：JoJo（StageModels）

拉利都幾着重今次嘅Service，全球都搞發佈會，兼且正式宣佈全線車系都可任你執靚靚，Parts同Option加埋超過40項，比過往齋揀車身顏色、換吓胎軨有更多玩法，若你財力雄厚全套50幾件換過晒，咁肯定你架拉利夠獨一無二，全球都幾難撞啱第二架一模一樣！
今次香港代理用咗架左軚版612Scaglietti做改裝示範，特別強調有幾樣Parts係新加落去，將架612改得更加有型有款。車外就有兩大個鮮黃色野馬盾章先聲奪人，望落啲，條20吋軨更隱含大大個卡箝，仲有車身噴油用上「50-60years」主題色彩，跟普通版612嘅炭灰差不多，雖然我好努力去望，都唔知有咩唔同，但PR小姐實牙實齒話有分別，OK，我投降！

■車身顏色、皮料等有晒色辦畀你慢慢襯，Model影呢Part玩得最開心。

典雅皮櫳為拉利降火

相比車身，內櫳變化多好多，首先座椅可換上DaytonaDesign，椅背及PatPat位均有一間間橫紋，本以為凸出嚟點會坐得舒服？但同行幾人試坐過後都一致讚好，加上仿桶椅傍實身體，感覺幾Firm幾舒服。全車皮料當然任你換，而且由軚盤、內門到座椅，均有淺色線車邊，做示範嘅612就襯得唔錯，為火猛車格添上幾分典雅，值得參考。嫌車廂太溫柔，大可加番個鮮黃色錶板，包你戰意即時提升，幸好速度錶等數字用番深色，不會因錶板太耀眼而難以睇清。若你認為辣跑點都要襯番Carbon（碳纖）做裝飾嘅話，亦可加兩條落門檻，上落車一定見到。

花一萬為iPod

係人都知Customize服務係專為有個人品味嘅貴賓而推出，我等窮人睇完個List真係嚇一跳，全套執齊要180萬，同玩開車嘅朋友閒談，佢哋話法拉利嚟講已經算平！咁到底拉利嘅貴賓境界去到邊？舉個例，新加嘅安裝iPod駁線，令你可享受一手掌軚盤、一手轉歌，咁Free盛惠$11,630，已經夠我買起全個iPod家族連Touch。另外可塞晒落尾箱嘅一套六件旅行皮具，有大篋有細袋，仲有西裝掛袋，全套16萬幾，媲美LV，不過睇埋質感同觀感，值啦！