「只有逃亡，才可以找到真正的自我，保有一己尊嚴。」呢句話，出自諾貝爾文學獎得主高行健手筆。高行健噚日獲中大邀請，出席新書《論創作》同《山海經傳》（英譯本）新書發佈會，慈善家方潤華都有到場，仲即場買咗高行健幾本著作索取簽名，變成小fans咁。
高行健同八方講，佢同中大繙譯系教授方梓勳好鬼老友，方教授多年來為佢繙譯著作，為咗答謝呢位老友，高行健將部份手稿、真迹同畫咗幅畫送畀中大。文學大師噚日又同百幾個中大學生真情對話，有學生問佢對四川大地震有乜感受，因為佢寫《靈山》時，曾遊歷四川同當地八個自然保護區，大師似乎唔想多談，淡然咁話，地震時人在旅途，對災難感到好遺憾。