廖碧兒、胡杏兒、李彩華（Rain）、泳兒同關智斌，前晚喺跑馬地出席雜誌周年派對暨頒獎禮，同場又舉行了時裝騷。獲得「Themosttrendiestcovergirl」獎項嘅廖碧兒一身BottegaVeneta低胸裙上陣，而獲「Themostfashionablecovergirl」獎嘅胡杏兒身穿JilSander桃紅短裙一樣搶眼。
杏兒想影裸照
露臍又露腿嘅李彩華趕喺開騷前抵達，由於一班得獎者及歌手一早就座，佢喺大會安排下要同其他藝人坐第二行，不過佢唔肯坐，仲開到口、手指指要坐前排，大會惟有喺廖碧兒身邊臨時加個位畀佢，點知阿Rain一坐低，銀色短裙即時走光露底，佢發現之後，先至急急用手遮住，但由於條迷你裙實在太短，點遮都依然走光，惟有改用個手袋遮住，仲要蹺埋腳遮掩㖭！
李彩華早輪俾人影到同《華僑日報》後人岑啓智（Alex）約會，佢例牌否認拍拖，佢話：「Alex係我識咗好耐嘅朋友，我哋約埋食吓飯啫，同埋我哋都好鍾意打golf囉。」問佢Alex係咪追求佢？阿Rain話：「唔覺喎，我都唔想咁快拍拖，大家keep住做朋友先啦。」不過，佢都留有一線，大讚對方夠高大，講到明係佢嗰杯茶。
另外，胡杏兒直認鍾意自己嘅靚相登封面，佢話：「有我上封面嘅雜誌，我都會買多本㗎，因為老咗可以留番畀仔女睇嘛。」佢仲話做covergirl唔介意性感，仲話將來大肚都會效法狄美摩亞影大肚裸照喎！
