一出世，陳志雲已是一個11.75磅重的超級巨B，乳名阿豬；阿豬雖然肥，但肥得可愛，被周遭的人疼錫，所以，陳志雲也順理成章地肥下去，不曾為自己的體重而自卑難過。直至五年前施南生一句：「乜你肥成咁呀！」陳志雲才如當頭棒喝，為擁有一個健康身體，他花了足足兩年由220磅減到現時的160磅。今日，就讓陳志雲公開他減掉60磅贅肉的奮鬥歷程。
撰文：戴彩煥
對上一輩家長而言，肥是福氣，所以陳志雲小時候可以肆無忌憚地大吃大喝，越肥便越多世叔伯疼錫。回想童年生活，陳志雲回味無窮：「我乳名叫阿豬，因為我一出世就係咁豬。肥嘅問題縈繞咗我好耐，但我又唔覺得係乜嘢一回事，因為肥嘅小朋友特別多人鍾意、多人錫，一出街都係契爺契媽，搣一吓就有回報，經過麵包舖俾人搣一吓就畀個麵包我食，跟住經過燒臘舖搣一吓又畀嚿叉燒我食，越食越多，越多越肥。」
俾施南生鬧醒
年僅10歲，陳志雲已是個120磅的大肥仔，小學時搭白牌車上學，因身形龐大要支付兩個人的車資，陳志雲也從來沒有感到自卑或難過。就這樣，陳志雲每長一歲便肥幾磅，40出頭，體重已高達220磅，那一刻，陳志雲仍未決心減肥，直至五、六年前某個首映禮上，被施南生一言驚醒。
陳志雲日前說：「嗰次係俾施南生刺激，我去睇首映，好多人喺度，佢見到我就話：『嘩！乜你肥成咁呀！你咁唔得㗎，好冇自律㗎！』我又覺得佢講得啱喎，如果唔好好控制一吓自己身體，真係好唔自律，於是我的起心肝去減，畀番多啲時間去投資自己身體，因為投資身體係一定有回報。」
減肥方式五花八門，但陳志雲未有花費分文便在兩年減去60磅：「其實減唔難，keep先係最難。嗰次我試過完全食菜同節食，但正確地減都係呢幾年嘅事。最基本方法係計算每日吸收幾多卡路里，肥人鍾意食，唔鍾意郁，所以運動同節食唔可以一齊嚟，是但做一樣先。太鍾意食嘢都係因為肚餓，咁我就唔畀自己肚餓，我會揀飲擇食，揀啲低卡路里食物食飽自己。如果今晚要同人食飯，有好多嘢自己鍾意食，我就會喺屋企先食一碟菜，墊咗個底，出去食飯咪唔會食得多囉。」
蘋果烚菜醫肚
陳志雲有四大減肥金科玉律，除了揀飲擇食外，要切忌吃得太快太急：「食得太快，個腦未收到你飽嘅訊息，你就自然會食多咗，所以要慢慢食。另外，瞓覺前唔好進食，如果真係餓到瞓唔到就食個蘋果或者烚碟菜。做運動要持之以恒，我最初游水減肥，雖然效果好過跑步，但時間上跑步較容易遷就，泳池啲氯氣太勁，對頭髮好傷，所以我放棄游水，改為跑步，初初跑20分鐘，跟住30、45、60分鐘。初初起步都幾難，跑兩三個圈已經好攰唔想跑，我之所以堅持到，係因為見到個老人家日日跑，仲跑得好勁，我唔可以輸畀個老人家，所以點都堅持落去。」
不少減肥人士開始減肥時都鬥志激昂，但最終因為欠缺恒心耐力而半途而廢，陳志雲也曾嘗過失敗，幸好最後給他找到一條良方：「要搵一個恒久嘅原因同信念去減，等於14年前我唔想殺生而食素一樣。在我嚟講，要對自己身體負責、對自己好啲，畀自己健康啲，呢個係我一個幾大嘅動力。」
半途放棄好蠢
陳志雲續說：「不過，並唔係叫你完全抑壓唔食，我好鍾意食雪糕同炸薯條，我想食時就會食，但唔會食咁多，每次只係食少少。噚日食咗今日就唔好食，過兩日再食，你可以當呢樣嘢係獎勵，如果日日畀你食，可能冇咁享受同珍惜，要記住開步嗰吓咁難，𠵱家放棄再開始過咁辛苦，咪即係搵自己笨？」
身體健康固然要注重，但陳志雲認為心靈健康亦不容忽略：「一定要令自己快樂，唔好俾任何嘢損害身心健康，有幾多財富都冇用，因為有健康身體先可以享受人生。」
減肥素餐單
早餐：橙一個、兩至四隻烚蛋蛋白、一片麥包、一杯清水或豆漿。
午餐：烚菜一至兩碟，或一個代餐（即一條proteinbar）
下午茶：不經油炸或鹽焗的果仁六至八粒，或一片麥包或麥餅、一杯無糖咖啡或健怡可樂或有氣礦泉水。
晚餐：正常用餐，但以蒸和烚烹調方法為主。
陳志雲提供
食得精明：車厘茄當小食
陳志雲的素菜世界裏，也可創造出各式各樣色香味俱全的美食。紫色的茄子、紅紅的番茄、翠綠的青瓜、又黃又橙的燈籠椒和紅蘿蔔等，不但繽紛奪目，而且不同色素有着不同維他命，幾乎每一款也是陳志雲的至愛。
車厘茄：最愛當小食吃，因維他命豐富、抗氧化、纖維素高和滑腸。
青瓜：清熱、利尿，由於毋須煮熟也可生食，十分方便，所以有時跟人家飯局前會先吃青瓜墊底。
茄子：紫色茄子維生素含量很高，最愛加上梅菜清蒸，煮出來效果有點似梅菜扣肉。
紅蘿蔔：含豐富胡蘿蔔素和礦物質，最愛加上大荳牙菜、粟米及黃耳來煲湯。
燈籠椒：顏色鮮艷，最愛用來做配菜。
超級巨B叫阿豬
不單止是女大十八變，男人一樣可以變，只要有決心，沒有事情是解決不來，看陳志雲40歲過後仍可來個大變身，便是最佳證明。
出世（11.75磅）
陳志雲出世時肥到眼睛幾乎睜不開，家人擔心他太肥胖，流汗時會「醃」損手手腳腳，於是用棉花攝在手臂和大髀罅。
小學（120磅）
小志雲小學時早餐可以一口氣吃三個出前一丁，晚上到上海菜館吃兩大碗粗麵再加半斤豬排，食量驚人，難怪10歲時體重已高達120磅。
中學四年級（150磅）
中學時，陳志雲試過服用減肥藥和節食減肥，但功效卻不持久，往往減磅不久便迅速打回原形；圖中他加入天主教會受洗時，便是他讀書時最瘦的模樣。
大學畢業（200磅）
大學時陳志雲修讀戲劇，由於老師曾說不懂吸煙沒資格學演戲，意思是起碼要懂得如何點煙，於是陳志雲便嘗試學吸煙，尤幸他對煙味十分抗拒，所以未因而吸上癮。
肥仔公務員（210磅）
87年至91年期間，陳志雲任職香港政府駐倫敦辦事處高級政務主任，於倫敦辦事處接待香港議員王䓪鳴（圖左）到訪，當年他體重超過210磅，對行街買衫完全沒有興趣，因所有靚衫幾乎都穿不下。
