以出位句「賣飛佛」揚名嘅無綫小生吳卓羲，自從冇拉褲鏈出席公開活動、傳佢扮大哥同向恩師古天樂借錢等等後，𤓓爆形象深入民心，人氣滑落谷底。之前一直有傳佢飛起官恩娜改黐當家花旦佘詩曼，點知近日再有報道話佢食軟飯，冧阿佘送20萬嘅AP名錶同過200萬嘅波子跑車充大頭鬼，簡直令佢𤓓到燶。
有備而來
被TVB中人封為羲哥嘅吳卓羲，噚日同謝婷婷、名模CaraG、鈴木仁、莊思敏，仲有奧運金牌得主李娜同張山齊出席運動品牌Columbia喺觀塘apm商場舉行嘅活動，大會特登將場地佈置成珠穆朗瑪峯，等啲藝人模仿珠峯傳遞聖火嘅過程。
扮完傳火炬後，有備而戰嘅羲哥一坐低就強調有必要澄清，佢話：「雖然冇睇報道，但屋企人話過畀我聽內容，總之本書所講嘅嘢，冇樣係事實，知道之後令我好唔開心。」
冇賒冇借
羲哥話被人一而再炒作新聞，令家人好擔心，佢話：「唔會為呢件事搵阿佘解釋，因為啲嘢都唔係真，同佢只係合作過一套劇，我連佢嘅電話（號碼）都冇，喺度重申我𠵱家擁有嘅嘢，都係我好辛苦咁一分一毫搵番嚟，冇去賒冇去借。」佢話市民應該關心四川災情，而唔係理會呢類冇意義嘅炒作，仲話會捐今次活動兩至三成嘅酬金去賑災。
此外，日前謝婷婷參與錄賑災歌，佢話：「嗰日好在拍住欣宜，始終有個有經驗嘅傍住好啲。」婷婷話如有需要，會義不容辭去災區教小朋友英語同電腦。
