意大利甲組球隊費倫天拿球星韋利（ChristianVieri）嚟咗香港，宣傳佢間公司旗下嘅品牌SweetYears服裝，前晚仲喺銅鑼灣LCX舉行時裝表演，出席嘉賓有官恩娜（Ella）、JaniceMan以及HotCha等。Ella一身低胸裝打扮，由於佢有份幫韋利手宣傳，所以佢哋好似好熟咁，合照時韋利攬主Ella條腰，隻手嘅位置啱啱好托住胸側。
事後Ella話：「佢隻手冇托住我，只係角度問題啫，韋利好有風度，同佢幾投契，我都鍾意睇足球，我捧曼聯同費倫天拿。」雖然佢鍾意外國球隊，但揀男友最好都係中國人，佢又話父母雖然好隨和，但都叫佢唔好揀外籍男友，有人問佢吳卓羲有冇見過佢父母？Ella即刻話：「唔好玩我啦！我專心工作，唔好提感情事啦。」韋利接受訪問時話，嚟到香港好想去玩吓同行吓街，又話自己設計嘅服裝有個心形圖案，因為代表活力同生命力。
Janice：我太後生
此外，有傳JaniceMan同賈曉辰（JJ）合作拍電影《內衣少女》時，杯葛鄧麗欣（Stephy），又嫌佢老，Janice否認話：「係誤會嚟，啲記者嚟探班同劇組有啲拗撬，喺唔清楚嘅情況下咁寫，其實我哋合作愉快，成日一齊食飯，佢冇扮大家姐，仲好好教我哋做戲，Stephy唔係好老，係我太後生啫。」