Freeze成員陳樂榣早前被踢爆與北京男模拍拖，兼奉旨合演火辣MV《踩鋼線》，未料她轉頭已踢走奀模，搭上名模AnaR.舊愛、Gucci亞太區CEO鄧婉穎的兒子潘熾恒，兩人撻着兩月已打得火熱，日前還拍拖去台灣玩足三日，至前晚返港仍難捨難離，齊返男方寓所繼續纏綿。
現年24歲的Freeze成員陳樂榣，儘管先後接受過割雙眼皮、開大眼（眼頭）及隆鼻等手術，但憑着重建面孔及34C、24、35.5的葫蘆身形，風騷蝕骨大跳性感辣身舞，依然引死不少男士，難怪曾與名模AnaR.拍過拖的Gucci亞太區CEO鄧婉穎的兒子潘熾恒（Devin）也拜倒她的石榴裙下。
到男方寓所過夜
今年3月陳樂榣被揭與北京奀男模Luke拍拖，二人更在FreezeMV《踩鋼線》中合作演出，但據知她於兩月前經友人介紹下認識Devin，感情發展一日千里，在剛過去的周日她和Devin更相約去台灣旅行。當日早上8時，二人已到赤鱲角機場的國泰經濟客位櫃枱排隊辦理登機手續，素顏的陳樂榣戴着cap帽，頭耷耷跟實男友，期間他們有傾有講，但完成手續後即雞咁腳衝入閘。
經過三日兩夜的甜蜜台灣之旅後，前晚10時陳樂榣和Devin返港，他們齊戴紫色圖案的情侶cap帽，由男方推車，女方殿後，並肩往停車場登上男方以逾70萬購入、落地半年的黑色Audi跑車。想不到他們朝夕相對三日仍未夠喉，先返陳樂榣的天后香閨逗留一小時，其後拖手落樓，再到男方的跑馬地寓所過夜，認真癡纏。
跟舊愛分手已久
昨日記者致電陳樂榣，被問到拖新歡出埠一事即口窒窒說：「大家好朋友啫，有發展空間，啱啱發展冇耐。」至於她是否有劈腿之嫌，她說：「我同Luke好耐之前分咗手，但大家仲有聯絡。」又問陳樂榣會否擔心被指嫌棄Luke改投潘公子懷抱？她則說：「Freeze出嚟時已經招惹閒話，唔怕人哋講。」由於她曾整容，不知會否因而受男方的家庭壓力？她說：「佢識我時已經知我係咁，佢咁大個仔，冇家庭壓力嘅。」
採訪、攝影：娛樂突發組
