黃伊汶（Emme）近年經常與余文樂的名字扯上關係，她前晚亮相《蘋果》網站直播節目《娛樂開CHAT》，與主持懷鈺談到余文樂，她直認對樂仔有好感，她說：「佢同我都係一個外冷內熱嘅人，要經過相處先至可以好friend，我哋都係玩得之人，所以可以玩到攬頭攬頸。」
Emme談及日前在無綫賑災騷中覺得新歌《渴求》不適合現場氣氛，最終選擇不演唱，她說：「公司為呢首歌book咗8個dancer，我理解公司覺得此舉是很浪費金錢的。」大家可登入《蘋果》網站 http://ent.appledaily.com隨時重溫節目。
採訪：葉雪
攝影：仇志中
懷鈺髮型：MattChiu（XENTERJUT）
新碟華仔克勤填詞
上水 Leon
Leon：我想問吓咁耐冇見，你做過啲乜嘢？有冇去學吓嘢呀？
黃伊汶：自從上一張碟《好睇》到𠵱家，已經兩年幾，主要係因為同前唱片公司滿約，同埋𠵱家嘅經理人公司會做埋唱片，所以需要一段長嘅時間部署吓。而我喺呢段時間，都拍咗一套內地嘅喜劇，喺長春又同梁家輝拍咗一套文藝片《欣月童話》，我諗遲啲會上映。
Leon：咁你拍戲有冇啲深刻嘅事可以同我哋分享吓？
黃伊汶：好似喺長春拍嘅《欣月童話》，因為呢套戲係講真人真事，所以我要喺拍之前先了解角色，戲裏面我飾演一個女記者，所以我要跟我飾演嗰個女記者去一啲好貧窮嘅家庭探訪，呢啲都係我平時唔可以體會到嘅。
Leon：新唱片會唔會有合唱歌呀？
黃伊汶：今次未有住，嚟緊我會推出國語專輯，到時可能會。不過今次有一首歌係劉德華幫我填詞，佢仲好好，畀咗兩份完全唔同感覺嘅歌詞我揀，仲有克勤都幫我填咗一首歌詞，所以我好多謝佢兩個。
舞台劇訓練應變力
青衣 Store
Store：你拍過戲又唱過歌，咁你仲有啲乜嘢想做？
黃伊汶：我想試舞台劇，因為可以訓練自己嘅應變能力，而且觀眾嘅反應好直接，所以好想試吓。
Store：咁你仲會唔會拍電視劇呀？
黃伊汶：我諗唔會住，𠵱家我會專注音樂方面先。
得閒畫畫未見得人
長洲 Willson
Willson：你學過設計，遲啲會唔會開畫展？
黃伊汶：開畫展？我都想呀！我有空閒就會畫畫㗎喇，不過𠵱家我覺得自己嘅作品未見得人，所以開畫展遲啲先啦。
Willson：嚟緊會唔會有慢歌出？
黃伊汶：會呀！大家要留意呀，應該係第二或者第三首派台歌，仲會係《殘忍》之後第二次自己填詞嘅。
