中華廚藝學院每年都舉行「美食之最」烹飪比賽，是香港廚藝界認受性最高的比賽。去年的「食神」——明星海鮮酒家的副行政總廚黃永強，憑一蒸一炸海味「魚‧港故事」奪得金獎，他為大家示範其得獎菜的簡易版。蒸炸變成一炒一炸，釀竹笙換成炒生魚片，秘技炒不爛的鮮甜生魚片與酸甜炸鱔極吊人胃口，平民版都見得人呀！
記者：廖秀娟
攝影：陳陶鈞
菜譜及示範：明星海鮮酒家副行政總廚黃永強
食神進級大師班
正牌食神黃永強師傅，入行22年，曾經於利苑、美心等酒家任職，現位列明星海鮮酒家集團副行政總廚。成為食神前從未正式學廚，當上食神後卻更覺自己之不足，今年積極參與中華廚藝學院的大師班課程，向更高境界邁進。
魚‧港故事
時間：30分鐘
份量：4人
以紅糟、鎮江醋及鮮醬油做的炸鱔魚，酸甜香脆；以魚露及金華火腿炒的生魚片，又鮮甜嫩滑，這一炒一炸、一濃一淡的河鮮，有香口、有甜滑，吃得人好滿足！
材料
白鱔1條（約1斤4両）、生魚5両、金華火腿絲5錢、雞蛋1隻、鎮江醋11/2両、鮮醬油3両、紅糟汁1/2両、砂糖11/2両、麵粉1両、魚露1/2湯匙、生粉水適量、鹽/胡椒粉/薑米/青瓜片/紅椒絲/韭菜花/番荽各少許
做法
1.白鱔起肉後，把鱔骨捲成圓形放入焗爐用150oC焗約10分鐘至定形，以少許麵粉搓成小塊做基座，把鱔骨圈固定擺在基座上，放在碟中央做裝飾。
2.鱔肉切成條狀，用麵粉、雞蛋、鹽及胡椒粉撈至起漿，再用油炸至脆身全熟。
3.混合鎮江醋、紅糟汁及鮮醬油，起鑊爆炒，加入鱔魚兜勻後上碟。
4.生魚起肉切成條狀後泡油。
5.起鑊爆炒薑米，加入生魚片及金華火腿絲兜炒，加入魚露、糖及生粉水，輕炒後上碟。
6.青瓜片、紅椒絲、韭菜花及番荽伴碟便可。
Vicky：你話生魚唔好咁大力推炒，仲有咩魚於煎炒時較易散㗎？
答：其實魚肉易散係因為煮得過熟，生魚都算係爽口有彈性，一炒得太熟魚肉會即散㗎！唔計價錢，當然海斑都唔易散。
煎釀鴛鴦藕餅
時間：30分鐘
份量：4人
豬肉、鯪魚肉各有口感、味道，一次過兼得，定必更得人歡心。肉餅煎得香口，蘸泰國甜甜辣辣的雞醬，果真是上佳配搭！
材料
蓮藕10両、脢頭豬肉2両、甜梅菜1両（切碎）、鯪魚青3両、蠔油1/2茶匙、幼鹽少許、生粉2両、糖/雞粉/泰國雞醬各適量
做法
1.蓮藕刨皮後切成8塊厚片。將豬肉剁碎連甜梅菜混入雞粉、蠔油、糖及生粉撈勻。另外鯪魚肉混入幼鹽、糖及生粉，撻至起膠。
2.豬肉及鯪魚肉分別平均釀在8塊蓮藕片上，每件拍上少許生粉。
3.用中火煎至脆身及熟透。食用時可配泰國雞醬。
Denise：肉餅及肉丸煎炸前放雪櫃雪一陣係咪會Juicy啲？
答：其實雪櫃會抽亁肉汁，雪得耐一定唔會Juicy，但可以定形，煎炸得靚啲係真嘅，最多雪20分鐘好喇！
彩椒野菌炒豬頸肉
時間：20分鐘
份量：4人
吸汁的菇菌與多油的豬頸肉是絕配，有了甜椒，清新甜味更增多，但別忘了提味的唐芹，少了它，整個菜會失色不少。
材料
豬頸肉3両、紅/黃甜椒各1個、野菌3両、唐芹1/2両、長葱度/糖各少許、燒汁1湯匙、蠔油1/3湯匙、紹酒1湯匙、生粉水適量
做法
1.豬頸肉切成薄片；紅黃甜椒切成條狀；野菌洗淨後備用。
2.燒紅鑊，加少許油，將豬頸肉煎至兩面金黃色，然後放野菌同炒至所有材料熟透，再放入彩椒條、長葱度及唐芹，加入燒汁、蠔油、糖及紹酒調味，最後用生粉水埋芡炒至亁身即可上碟。
Cindy：點解炒完啲菇菌食落好苦？
答：其實菇一定有啲苦青味，煮前走油係最好方法；屋企做唔到的話，汆水都可以。
冬瓜粟米瑤柱湯
時間：2小時
份量：4人
完全沒下肉下糖的湯，卻清甜無比；後下的冬瓜又可以當餸食，飽肚又健康，女士恩物！
材料
冬瓜10両、瑤柱4粒、蜜棗4粒、粟米2棵、薑1片、鹽適量
做法
1.冬瓜連皮切厚片；粟米切段；瑤柱、蜜棗及薑片洗淨後備用。
2.粟米以白鑊煎香備用。
3.粟米、瑤柱、蜜棗及薑片加10碗水，先煲1小時後放冬瓜片再煲45分鐘，加適量鹽調味便可。
Iris：點解煲湯前要煎一煎粟米呢？
答：粟米用白鑊煎過，裏面的糖份同澱粉會受熱濃縮，煲湯時特別甜。
網上重溫
http://cooking.appledaily.com