再Wide啲再潮啲

潮人機總會着數啲，明星一揸娛樂版一見報，即刻有大把Fans追住買，RicohGR就係最佳例子。所以三星上回搵完Miki楊愛瑾、潮人攝影師SunnyLau力谷旗下相機，今勻新作蒲頭再找來潮友余文樂撐場。初露面的NV24HD數碼相機，機身輕薄更具備HD高清拍片及24mm廣角，唔知各位潮人有無興趣追住用呢？

記者：許福合
攝影：陳陶鈞

余文樂：戴手套都影到！

余文樂成為三星相機代言人，佢就話等咗好耐。因為佢好鍾意影相，一向機不離身，拍戲出埠都會影餐飽，甚至做運動、滑水、打WarGame都要影！而阿樂就話最鍾意呢部NV24HD可以戴住手套嚟影相，因為夠快之餘快門位又夠就手，玩緊都可以影相最啱使。

潮人機拍高清片

見到NV24HD其實有些少失望，因為論Design，同上幾代分別不大，都係黑機配支Schneider-Kreuznach鏡頭，最令人有印象嘅藍色圓環仍然保留，但新鮮感不再。雖然外形無驚喜，但作為一部潮人玩意來講，開機速度相當快，能做到隨時Standby隨時Snap，感覺上一抽出就可以「開槍」！除此之外，NV24HD具備高清攝錄功能，能拍攝720p影片，最正係機身兼備HDMI，可以全數碼方式輸出至電視上欣賞，比普通卡片機、手機靚好多。

■拍完影片之後，可以用HDMI駁去電視欣賞。

■人臉對焦功能新增偵測眨眼及微笑拍攝。

千萬像素24mm廣角

講番影相功能，NV24HD可以拍攝1,030萬像素相片，已足夠一般冲曬相片之用。Schneider-Kreuznach鏡頭光學變焦能力為3倍，以今日標準就細咗啲，遠攝能力弱，但又玩到24mm廣角拍攝，算係補番數，可以影橫啲影闊啲！機背屏幕大小為2.5吋OLED，據知反應速度會比LCD快，試用時最明顯係當快速移動鏡頭，畫面都能緊貼追上，玩一陣都覺得幾滿意。