豪門故事多，兄弟各有說法。關於公司公事，外行人未必了解，咁複雜之事，留番畀律師，財務專家，地產專家判斷可也。
但講到醫生，食藥，點解唔食藥，食乜藥，要在阿媽面前食藥等等，因人人都有食藥經驗，於是意見就多咯。最簡單一個案例就係H主持前排咳咗三個月，因涉及氣管敏感，食咗主診醫生配藥個幾月，冇法子止咳，於是家人、朋友，連唔識得嘅聽眾都教佢食邊隻邊隻靈藥；經紀K仲好關心，從記事簿上抄出一隻藥名，叫H主持去買，話百試百靈㗎！H主持睇真隻藥水名稱，即刻拎自己樽藥水對一對，哎吔，原來名稱相同，H主持惟有苦笑：「多謝晒，我已經飲咗三樽嘞！」
記者C好熱心，知道公立醫院一隻止咳水好似馬尿咁嘅味，但好有效用，於是周圍同H主持搵。H主持話人人都有一隻心目中之靈藥，但吃藥係好個人嘅，對阿A掂，對阿B未必一定掂，但既然人人都關心佢，虧佢頂得順，一於來者不拒，於是照肺知道冇事之後，一共飲咗七樽藥水，吞咗三種咳丸，兩種敏感丸，最後見到七十幾歲嘅退休西醫B，向佢請教，西醫B騎騎笑咁話：「西醫最叻殺細菌，既然你咳係因為敏感而唔係肺有事或喉管發炎，西醫就冇符，你只能靠中式食療。嗱，畀啲耐性，晚晚飲一盅川貝燉蘋果，一個蘋果剝皮切開幾塊，放落燉盅。注滿水，加兩茶匙川貝粉末，燉一小時，想鹹就加一兩塊瘦肉，想甜就加少量冰糖，攤到暖暖地就飲晒佢。」
H主持既然苦無良藥，惟有照辦，三個星期後，果然好番。普通咳嗽啫，都咁麻煩，你話如果畀人講到精神有問題，腦袋有事，你話點辦？係唔係家人朋友叫你食藥，你就照食無誤？豪門大哥話食完史丹福教授之藥（lithiumcarbonate300mg）就覺得委靡不振，於是搵港大中大教授及中環腦科專家會診，四位專家都話佢冇事，於是再唔肯服食，識得咁諗，腦筋係正常還是不正常呢？但點解其他人係要大哥繼續食藥呢，或者係不是吃藥人，不知吃藥苦之故。