噚日先提到阿里巴巴（1688）主席馬雲，被人將舊聞當「新」聞，話四川地震佢只捐一蚊畀災民，惹嚟網友圍攻，搞到要急急澄清，仲話已經捐咗4700幾萬銀人仔救災。而大陸地產股龍頭萬科老闆王石，因早排呼籲員工最多捐款10蚊賑災，認為唔好「泛慈善化」，「企業捐贈不應成為負擔」，同樣做咗網友箭靶，俾內地網友冠上為富不仁，前晚萬科亦漏夜發通告，急批一億人仔協助災後重建。唔知咁可唔可以幫佢贏番啲民望？
星期二晚，萬科喺深交所網站發出通告，話董事會同意批准公司參與災後重建，並撥款一億人仔，以綿竹市遵道鎮為重點，仲講到明此項工作純公益性質，絕無商業成份。
萬科解釋，自地震發生後，公司一直留意災禍嘅最新情況，想搵對災區最有價值嘅協助方法，考慮到災後重建係長期持續嘅過程，所以決定發揮萬科嘅專長嚟幫助災區重建，咁萬科最叻係乜，梗係起樓啦。