大地震之後，各大小企業都爭住捐錢賑災，專做燈飾嘅瑩輝集團（1163），就比較反傳統，賑災唔捐錢而係捐電筒，一次過捐咗五六千支咁多，諗真啲又係嘅，好話唔好聽，災區嘅電力供應時有時冇，一點燈光比起一張百蚊鈔票，又確實係有用好多。
瑩輝集團執行董事白秉臻話，佢哋嘅生產線喺東莞，而啲加盟商少有去到四川咁遠，暫時都未收到受影響嘅通知，算係好彩。
勞動法傷過地震
地震冇震到佢哋，但一條勞動法就令白秉臻呻到樹葉都落！佢話以前養一個工人成本只係400幾人仔，家吓就升到千一二蚊，再加埋佔佢哋生意額85%以上嘅美國市場，經濟唔好，同埋人仔滙率高企，真係唔使地震，日日見到條數心都震。