由曼聯對車路士的歐聯決賽，今晚就在莫斯科開打；遠在地球另一邊，四川災民仍處水深火熱，《拉闊足球場》讀者義不容辭，承諾今晚命中歐聯賽事，就捐錢賑災，值得球迷支持。
Andy：格蘭唔博等幾時
我本身係車路士fans，但唔明點解格蘭走去博最後一場聯賽，最終都過唔到曼聯，又博傷泰利；始終兩隊英超隊碰頭，一定保守，上半場唔慌有波入，下半場一球分勝負。我一向有捐錢，南亞海嘯都有捐，今次一定支持。
金句：無理由格蘭走去博香港小姐，唔去博世界小姐。
貼士：半全場：星期三19曼聯和/主（5.3倍）@$70
半全場：星期三19曼聯和/客（6倍）@$70
Marco：買0:0博更好分頭賑災
站在睇波角度，0:0波膽真係悶啲，但比較「半場和」、雙方1:0波膽呢啲大路選擇，6.5倍嘅0:0已經有較好分頭，所以我孤注一擲，希望中多啲，可以捐多啲；呢場決賽關鍵在於上半場，睇吓雙方有冇波入，如果上半場冇波入，下半場料更加保守，我個0:0就叫晒糊。
金句：雙方耳熟能詳，入波唔多。
貼士：波膽：星期三19曼聯和0:0（6.5倍）@$140
阿樂點睇：紅魔輸贏照捐錢
身為曼聯球迷，我等呢場決賽已經9年，心情十分激動；曼聯上季足總盃加時輸畀車路士，唔會重蹈覆轍；今場關鍵係泰維斯會否正選，如果有佢上陣，場波會好睇好多，預期曼聯可大勝3:1捧盃；今仗贏輸都會捐錢，曼聯贏就捐多啲。
金句：車仔歐聯作客和過奧林比亞高斯、輸過畀費倫巴治，邊有霸氣？
貼士：半全場：星期三19曼聯和/主（5.3倍）@$100
波膽：星期三19曼聯勝3:1（25倍）@$40
《拉闊足球場》下次舉行日期：29/05
