趙式芝同佢老竇趙世曾都係愛蒲一族，日前佢哋父女各自各精采，同另一半分別去咗中環同銅鑼灣happy，不過趙世曾就好似大爺咁俾靚女服侍，相反趙式芝就全程做阿四咁服侍人，真係同人唔同命囉！
食飽買雪糕
早幾晚，趙世曾又再次撇低女友許冬梅（Wendy），同另一位國產女友金妙英去蘭桂坊食飯，食飽之後見妙英攞住一大袋外賣，相信係佢哋食剩打包嘅食物，至於趙世曾就一於少理，雙手插住褲袋好似大爺咁大搖大擺自己行，一啲幫吓手嘅意圖都冇。後嚟佢哋途經一間雪糕專門店，趙世曾又買咗一大盒雪糕，同樣又係畀妙英攞住，十足十跟身妹仔咁款。
攬膊一齊行
不過，另一邊廂嘅趙式芝同佢老竇就啱啱相反，佢同同性密友、波爾錶太子女楊如芯（Sean），仲有一個女性朋友去銅鑼灣翠華餐廳食消夜，估計Sean之前飲酒飲大咗，所以離開嘅時候，見佢行路都左搖右擺企唔穩。之後趙式芝做司機揸車送咗個女性朋友返酒店之後，就揸車車阿Sean返佢哋喺渣甸山嘅愛巢，返到屋企嗰陣，阿Sean仲係「pair吓pair吓」咁行，趙式芝於是攬住佢個膊頭一齊行，真係似足阿四咁服侍周到喎！