雖然母親節已過，不過我求大俠一定要表揚吓一個超級孝順仔，佢就係NBA邁阿密熱火球星獲廸；「閃電」喺上個禮拜日，為咗痛改前非、大徹大悟嘅媽媽，特別為佢送上一份非一般禮物，係咩？一間教堂！
話說獲廸小時候，係由大佢4歲嘅姐姐一手湊大，唔單只因為窮，而係佢媽媽祖蓮達（JolindaWade）自甘墮落，唔係酒不離口就係吸毒，坐監同喺戒毒所或戒酒中心嘅時間仲多過喺屋企，搞到獲廸同佢3位家姐細細個就失去母愛。幸好獲廸自愛冇變壞，否則邊有今日年紀輕輕就腰纏萬貫，前途光明？講番獲廸呢位孝順仔，咁多年嚟佢都對呢位不自愛嘅母親不離不棄。
痛改前非信教做牧師
經過兒女不斷勸導及無數牢獄之災後，祖蓮達7年前終於痛改前非，不單成為虔誠基督徒，而且仲做埋牧師，親自宣揚愛的信念。
祖蓮達最初只係喺一間租番嚟嘅屋仔向信徒傳福音，但信眾越嚟越多，由最初嘅47人增至百多人，當中仲包括獲廸隊友奧尼爾同湖人名宿「魔術手」莊遜嘅母親㖭！為咗建造一間更大嘅教堂，祖蓮達喺年初睇中一幢待售嘅殘舊物業，諗住借錢嚟買地興建一座教堂。
獲廸獲悉後，瞞住母親買下該物業，仲靜靜起教堂；喺上周日，「閃電」終於將呢個意義深重的禮物送畀母親。喺開幕儀式上，有愛兒守候身邊、心靈上又有「神」守護嘅祖蓮達熱淚盈眶咁話：「我感覺每日都不斷地重生一樣，每日都好似有美好事發生，感謝神嘅眷戀。」獲廸更加話，所有人都認為佢係家中一個奇迹，其實佢母親先至係真正奇迹。