前排業績公佈期，富豪啲人工俾人鬥一番；家陣捐款賑災，富豪捐幾錢一樣要比，所以話富豪唔易做。內地騰訊網刊登咗「17位房地產富豪地震捐款榜」，除咗寫晒各人捐款，仲好認真咁對17位富豪評價一番。查實捐錢講心意，大家盡力而為就得，不過華華就對啲評價幾感興趣。
好似呢排因為兄弟不和，日日見報嘅郭炳湘亦上榜，報道指新地（016）除咗之前已經捐咗500萬銀，喺成都嘅員工仲組成12人嘅救援隊到災區。對於佢哋嘅評價係「郭氏三兄弟齊心協力，共同把家族公司推向新高峯，可謂手足情深的典範。」究竟係內地媒體唔係好跟得貼香港嘅新聞，抑或係太過客氣，定話係想潤吓三兄弟呢？
除咗郭氏兄弟，超人李嘉誠個人同公司共捐咗億幾人仔，所以報道對佢嘅評價亦好推崇，話佢係「楷模中的楷模」。不過，透過世茂集團捐1000萬港銀嘅許榮茂，評價就冇咁客氣，話佢係「非常富有覇氣和侵略性的一個老闆。」點解有呢個評價？報道並冇提及。