恒生銀行（011）副董事長兼行政總裁柯清輝，幾乎年年都會喺佢哋贊助嘅乒乓球學院畢業禮度，同啲小朋友抽幾板顯身手，不過，今年撞正一連三日全國哀悼期，喺不宜喜慶情況下，取消咗柯大俠同小朋友對打嘅環節，儀式開始前仲一齊默哀。
不過，柯大俠都喺台上同主禮人傾吓偈，佢話，打波梗有輸贏，最緊要係盡咗力，同埋好似佢咁，屢敗屢戰，畀多啲機會自己，若果打波真係唔得嘅，咪試吓做第二樣囉，天生我才必有用嘛！
唔知係咪唔使落場打波，冇壓力，柯大班上台前後，都好輕鬆，仲得閒到同隔籬嘅霍震霆傾偈，傾乜內容華華唔知，但見佢哋傾到興高彩烈，雙手係咁做出各式各樣抽波動作，似係講緊波經，唔通冇得打波手癮起？