賑災可以話係有錢出錢,有力出力。四川家吓水深火熱,大家都係中國人,梗希望有心又有錢嘅人可以捐多啲,令更多人可以受惠。不過,繼之前萬科集團主席王石話,中國成日有災害,所以捐款唔好成為企業同個人嘅負擔,呢番言論搞到喺網上俾網友圍攻之後,前日好多內地網站引述報道,指阿里巴巴(1688)主席馬雲只係捐出一蚊,理由係「捐款不在於多少,一元錢也足夠表達態度。」報道仲引述馬雲話:「對那些螢光燈下的慈善捐款,我覺得每次捐一塊錢就夠了。」
言論出自06年舊話
呢個報道喺網上廣泛流傳,馬雲話晒係「中國電子商務之父」,身家以億元計,只係捐一蚊,難怪俾人唱。不過,直至前晚,阿里巴巴深夜出聲明,話《馬雲為汶川捐款一元錢》係假新聞。聲明詳細列出,截至星期一(5月19日),阿里巴巴為汶川抗震救災籌咗同捐咗4744.7萬銀,其中公司同員工佔594.7萬,公司設立災後重建基金2500萬,通過阿里巴巴嘅平台又籌咗1650萬。
咁究竟捐一蚊單嘢點嚟㗎呢?據聲明講,篇假新聞係用咗馬雲06年一次被採訪嘅舊話。華華搵到喺06年10月嘅報道,馬雲參加咗一個慈善捐款活動,當時佢承諾要捐出一筆錢,但活動上有主辦者同佢開玩笑話:「某某老總捐1000萬噃。」馬雲梗唔啱聽啦,所以就回佢一句「我要大力提倡捐一塊錢的風氣,不要總是把善心、愛心和捐款金額掛起鈎來!」
自阿里巴巴作出聲明之後,華華喺網上面已經搵唔番段「假新聞」嘅原文,加上篇報道喺網上廣泛流傳,華華亦搵唔到最先嘅出處。所以點解啲網站會引述一篇舊嘅報道?真係一個謎!
電郵:mailto:[email protected]