立體射擊不朽名作《Quake》，相信係所有FPS愛好者甚至資深機迷冇可能唔識嘅名字，皆因佢同《Doom》都係出自idSoftware手筆，喺九十年代瘋魔全球各地青少年。到咗𠵱家呢個重視上網互片嘅年頭，已成全球No.1發行商嘅Activision利用有關版權同技術炮製系列最新作品《EnemyTerritory:QuakeWars》，俾新知舊雨透過網絡環境進行正邪大決戰！
文：陳福榮
聯邦軍火併外星生物
遊戲設定係好正路嘅地球聯邦軍隊大戰外星生物Strogg，為咗侵佔土地而戰。話晒地球人畀人感覺係忠到出汁，然而各自設有五種不同部隊，軍勢堪稱對等，只係名稱與微細特性上稍見不同。譬如地球嘅醫療兵Medic外星方面就叫Technician，負責起嘢嘅建築兵又只係個名唔同，同經典RTS《Starcraft》三大種族各走極端簡直係兩碼子嘅事，大抵可以當地球人同外星人係一樣咁玩，當然你要頂得順班外星生物副尊容。
飛機戰車威力勁
如果鍾意玩FPS嘅朋友，俾齋攞支槍周圍辣咁死咕咕嘅玩法搞到好無癮，咁《QuakeWars》一定令你滿意。事關唔同武裝程度及火力嘅車輛，地球軍同外星人各自都有三款，仲有曉得周圍飛嘅空戰部隊，當然唔少得外星人屈機到震嘅兩腳步行型超強機體StroggCyclops，就算唔發射大炮搵佢嚟不停踩人都非常過癮。至於地球軍嗰邊亦有只此一家嘅水陸兩用車，都算係平衡番兩邊火力。
搞掂總部就算贏
本作嘅遊戲流程非常簡單，只要完成一開始給予玩家嘅目標就算過關，或者掉轉喺規定時間內守住主陣亦可，總之整體上係不停攻守互換，攻唔入就要守。
除咗主線任務外，玩家仲可自發性執行一啲冇明顯提示嘅目標，好似破壞特定障礙物以便攻略時更為順暢等。當通過指定嘅任務目標、向敵方造成傷害及有效幫助我方部隊後，就可賺取用嚟提升部隊能力嘅經驗值，甚至用佢嚟整勁啲武器與重型車輛，但過咗版所有強化都會自動打回原形。
PS3與360有不同
今次Xbox360同PS3嘅《QuakeWars》，分別係由NerveSoftware及Z-Axis負責開發，前者曾炮製過Xbox嘅《Doom3》同《重返德軍總部》，至於Z-Axis則有前年跨平台嘅《變種特攻》，基於口碑麻麻因此照牌面睇360版似乎領先少許。根據普遍外國遊戲傳媒目前嘅評分，佢平均都拎到8至8.5分，相信唔止係畫面夠殺咁簡單，可玩性同耐玩性都唔算太差嘅。
機種：PS3、Xbox360
廠商：Activision
類型：ACT
人數：1人（網上連線16人）
日期：5月27日
售價：約$340
