成日中港兩邊走嘅勤+緣（2366）行政總裁梁鳳儀，喺5月12號四川大地震嗰陣，正正就喺災區重慶。佢話，事發兩點幾嗰陣，佢身在重慶機場貴賓室，等緊上機飛上海；當時瞌緊眼瞓，突然感到坐緊嗰張椅係咁震，仲以為貴賓室換咗張按摩椅，跟手朋友拍醒佢，叫佢快啲走，話可能係地震，然後就聽到廣播，叫所有人離開機場到戶外。
梁鳳儀喺室外見到機場大樓嘅玻璃係咁震，跟住停咗冇耐，竟然有廣播叫佢哋上機，咪以為好小事囉，直至飛到上海之後，先知咁大件事，而重慶機場隨後亦禁飛，家吓睇番件事，可謂執番身彩。
意外之財賑災
大難不死嘅佢，事後都話冇有好怕，仲私人捐咗成百萬畀災民；而公司亦因為地震，意外多咗筆收入，皆因國內唔少電視台，災後都想播啲切合「時勢氣氛」嘅劇集，咁啱佢哋有套以76年唐山大地震為題嘅應景舊劇《無情海峽有情天》，各省電視台都向佢哋攞重播權。佢哋已決定，將呢筆「意外之財」捐出嚟賑災。