四川大地震，唔少喺四川有業務嘅上市公司亦受到地震波及，當中災情最嚴重嘅莫過如東方電氣（1072），地震第二日朝早宣佈停牌，股價復牌至今插水達17.3%。
股價跌事小，人命傷亡先事大，因為東方電氣旗下東方汽輪機，喺四川附近有廠房，地震後，有超過60個員工死亡，500人失蹤。但公司董事長斯澤夫強忍傷痛，喺地震後第四日，即16號星期五，朝早如常喺災區四川成都市集團公司嘅會議室舉行股東會，唔畀地震影響到公司嘅日常運作。
3個股東出席
華華睇番東方電氣事後公佈，去到現場參加會議嘅股東計埋得3位，其中A股類別股東佔2位，H股得1位，而透過網絡投票嘅A股股東就有55位。
咁又係嘅，大地震後，除咗救災人員敢去四川，試問股東又點會去呢。