楊千嬅的世界巡迴演唱會經已展開，昨日她飛抵首站多倫多舉行記者招待會及簽名會。雖然身在異地，但她仍然很關心四川的災情，當獲知在汶川映秀灣電廠，救援人員救出一名被埋近180小時的生還者，她不禁向前線的救災英雄致敬。
楊千嬅昨日在多倫多的潮流新熱點錦繡中華舉行簽唱會，當地數百名歌迷一早到場等候偶像到臨，其中一名超級女歌迷是由香港到當地留學，幾日前得悉千嬅來演唱，專程到機場守候，當見到偶像時，女歌迷立刻衝上前相擁，並且數度落淚。
重申無意開玩笑
原來這位女歌迷在香港時已認識千嬅，所以歌迷的熱情表現並未嚇倒她，千嬅表示：「因為我細佬都係一個人喺英國讀書，所以我好明白佢哋嘅感受，同呢個歌迷識咗好多年，佢第一年嚟到多倫多，每日都會寫信畀我，一個人離開家人出國讀書係要有毅力同勇氣，尤其當發生問題嘅時候，要一個人去面對，我呢個歌迷今年就大學畢業，佢打算返香港搵工，仲請我出席佢嘅畢業禮。」
對於上周她出席賑災活動，被問到與緋聞男友丁子高的結婚傳聞時，她當時表示：「撞鬼囉！乜咁驚呀，驚嚇程度仲驚過地震。」此番話引起網民批評，千嬅前日已為這番言論作出道歉，昨日她重申無意拿四川地震的慘劇來開玩笑。現時她雖然身在外地，但對災情仍很關注，同時她高度讚揚日以繼夜搜救生還者的英雄。
「呢幕令人好感動」
千嬅表示：「我以前做過護士，所以明白救護人員嘅任務相當重大，喺我內心一直想向呢班英雄送上深切嘅慰問同祝福，當我睇到汶川映秀灣電廠，救援人員凌晨救出一個被埋180個鐘嘅生還者，佢係目前被埋災民之中，存活時間最長一個，佢獲救時仲係神志清醒，可以同救援人員講嘢同飲水，呢一幕令人好感動，對救災英雄嚟講係好大嘅鼓勵，只要唔放棄，一定會有奇迹發生嘅！」
撰文：葉雪
