CSL前行政總裁伍清華（Hubert）自從舊年辭任後，坊間一直未有聽聞佢嘅新動向，原來最近佢加入咗億軟信息技術做董事。億軟就係舊年攞到政府外判嘅電子證書服務嗰間公司。
華華好奇點解Hubert會入呢間公司做，原來億軟創辦人之一陳婉華舊時同佢喺數碼通（315）係同事，同億軟主席梁國偉亦都識咗好耐，Hubert話係入嚟幫吓手，希望將過去喺電訊業嘅經驗帶入嚟，協助公司發展。
答案真係幾「行貨」！睇真的，原來億軟一直有為電訊公司提供解決方案，主要客戶就有中移動（941）、中電信（728）同CSL，生意額都過億。
Hubert仲話，電子證書服務其實好吸引，相關嘅配套同增值服務有好大商機，唔係好似市場睇得咁差。以Hubert喺電訊界嘅經驗，話唔定第日電子證書服務可以喺電話用到都唔出奇。