港股承接上個禮拜悶市，維持喺25000點至26000點之間上落，就連過去比較活躍嘅滙控（005）同中移動（941），近期亦稍欠動力，似乎短期內未有利好消息刺激港股破位而上，散戶亦想等待大市方向轉趨明朗先再度入市。
孫：孫柏文 李：李錦 姚：姚浩然
姚：雖然中國發生地震，我相信宏調措施仍會繼續，暫時睇唔到有一個好好嘅因素喺度，經過4月份大幅上升之後，𠵱家似係進入一個上落市局面，26000點個阻力位都幾大，就算恒指破到上兩個星期26300水位，亦未必有力再上，噚日市場焦點落咗去資源股身上，除咗資源股，港股的確冇乜方向。
孫：當年美國發生911事件之後，佢哋即刻減息挽救經濟，今次中國面對大地震，宏調會繼續做，定係會轉軚？
李：今次中國地震，四川喺中國經濟嘅角色其實都幾重要，我估中央應該唔會轉軚；放鬆宏調。仲有，現時入市嘅人比較少，主要都係對冲基金。𠵱家無論係基金定係散戶啲錢都靜晒，近期成交小，升幅又唔高。不過，相信後市有一定嘅反彈力。
煤價硬淨買中煤
林小姐：想問一問隻中煤能源（1898），𠵱家應該點去部署，同埋應該把握邊啲板塊？
姚：內銀股其實都幾受壓，交通銀行（3328）A股因為有流通股解禁，所以H股都會行唔郁，地震又會拖累保險板塊，變咗成個金融服務板塊都行唔郁，地產方面受到調控，所以都係行唔郁。近期當炒嘅始終都係資源商品，美元回落幅度唔大，日圓又唔會過強，啱啱好造就資源價格走勢。過往煤價喺第二季比較弱，今年煤價就企得幾硬淨，就連證券行都出嚟調高整個行業嘅評級，所以之前落後嘅神華（1088）、中煤都可以睇好。
荃灣林小姐建議
建議買入價：現價
目標價：—
止蝕價：—
時期：一星期
用神華輪博反彈
劉小姐：我之前買咗神華CALL輪（4756），見神華能源（1088）正股喺37蚊頂住唔上，咁我就喺0.83蚊放咗隻輪，𠵱家仲有無機會撈得返？
孫：神華本身比較落後，落咗車又想繼續追落後應該點？
李：反彈通常都會彈三日，𠵱家反彈咗兩日（昨收市計），照計仲有機會升，可以揀番啲貼價，行使價38蚊以下，引伸波幅55%至57%之間嘅窩輪，其實我覺得資源股都仲未炒完。
姚：神華正股再上39蚊左右都有可能，但正股第一、二日一定行得好快，再上去啲人就會驚正股未必上到40蚊，到時可能正股同窩輪唔跟住行。正股去返36蚊個啲位都係幾好入窩輪嘅水平，博佢返去之前高位39蚊。
長沙灣劉小姐建議
建議買入價：0.83元
目標價：—
止蝕價：—
時期：三日
光控值博率低
陳小姐：想問中國光大控股（165），我好鍾意不過一直都無買，咁𠵱家買唔買得過？
姚：由於佢證券同銀行業務有機會今年喺內地分拆上市，所以同內地股市有掛鈎，所以要等下一浪A股再上，股價先有上升力，19蚊樓下可以考慮入貨。佢股價嚟到呢啲位唔係咁吸引同咁穩陣，不過你都可以留意A股上升時坐轉順風車。短期嚟講我唔會揀佢，因為炒資源股可能仲快獲利。
李：真係要等佢喺內地嘅光大銀行成功上市之後，隻股先有機會再上，加上佢派息唔高，我覺得佢值博率一般。
長沙灣陳小姐建議
建議買入價：18.8元
目標價：21元
止蝕價：17.5元
時期：一個月
EMAIL解答：高價買中電為避難
ClarieKu：上月中以63.2蚊買入中電（002），當時因為驚個市跌，所以諗住公用股有避難作用，股價去到62.3蚊止蝕，抑或繼續坐吓先？
姚：如果諗住避難概念，就沽咗中電，等個市好番啲，再買其他股份。如果唔揀啲防守性好高嘅股份，又唔需要收佢4厘息嘅話，就要揀進取啲嘅股份。
李：中電其實係一隻上落幅度好細嘅股份，如果打和之後再入市就要諗吓，短炒股份要揀升到5%以上嘅，而長揸就要起碼升10%，所以彈上去打和之後可以走咗先，之後再計劃買其他回報高啲嘅股份。
讀者ClarieKu個案
買入價：63.2元
目標價：—
止蝕價：62.3元
時期：—
每日收市後4:30pm
歡迎click入 http://finance.appledaily.com以webcam參與節目及收看
歡迎phonein28698262暢談心得
亦可email至mailto:[email protected]搶先貼股