今日星期三晚夜馬，本來係《南華早報》賽馬夜，有「南華早報盃」，氣氛會十分熱鬧。點知道星期一早上十點半左右就收到幾位馬主電話，通知星期三夜馬取消，理由係香港配合全國哀悼四川地震死難者，由星期一至星期三一連三天全國取消所有公共娛樂活動。
此消息嚟得突然，幾乎令馬圈人士措手不及。習慣上，星期三夜馬排位，在星期一早上九點鐘左右完成程序，馬經隨即付印，早上十點幾，最遲十一點，中環已有部分馬經出售。聽評馬Ｙ講，星期一嘅排位程序啓動後，一切如常，佢知道一啲馬經如《騎師》、《專業》、《職業》喺十點後左右已經印刷好晒，預備出街，一啲馬經正在印緊，大家收到消息後，滿臉愕然兼失望，唯有將印紙成本註銷，怨聲四起。
並唔係話大家唔為死難者哀傷。好明顯，中央在五月十八日晚上發出下半旗、默哀、取消一切公共娛樂活動通知，港澳特區緊跟，自無不合，但係點解唔在星期日晚或星期一早上排位之前，就宣佈取消五月二十二日星期三之夜馬賽事呢，一早取消排位，大家就知道乜嘢事，全體尊重停賽，唔使浪費人力物力，將新聞紙消耗啦。評馬Ｙ忖測係特區政府高層反應慢，好可能在星期一召開早禱會之後，決定配合中央，先至打電話要馬會取消星期三夜馬賽事，搞到馬會手忙腳亂。啲政府高層好少去馬場，根本唔知道賽馬運作程序，所以完全無視對馬經出版人爭分奪秒嘅情況，又或者係馬會要得到政府批示，而九點前無法接觸到啲高官。
馬主Ｋ來電話，與其取消今晚星期三賽事，其實馬會（如果得到政府批准嘅話）可以實行馬照跑，晚上七點十分就全場肅立、奏國歌，快活谷全場人士默哀三分鐘先至展開賽事，而聲明全晚投注額之博彩稅及馬會佣金（加埋約19%-20%）撥作賑災之用，並且將是晚之贏馬（一至五名）獎金百分之一百撥作捐款（即係馬主馬房騎師練馬師捐款），如此一來今晚可為四川災民籌得億幾二億元，又更加可以將全晚馬會餐飲收入撥作善款。停賽係形式上哀悼死難者，將夜馬變成賑災慈善賽，係為生還者着想，究竟邊一個做法更有積極意義？